Bloomberg: Tramptyń málimdemesinen keıin Ormýz buǵazyndaǵy qozǵalys toqtap qaldy
ASTANA. KAZINFORM — AQSh prezıdenti Donald Tramp 3 mamyrda Vashıngtonnyń Iranǵa usynǵan qaqtyǵysty retteý usynystaryna Tegerannyń jaýaby qabyldanýy ekitalaı ekenin málimdegen bolatyn. Onyń aıtýynsha, Iran «jetkilikti joǵary baǵa tólemegen». Bul týraly Bloomberg agenttigine silteme jasap, TASS jazdy.
Osy málimdemeden keıin Ormýz buǵazy arqyly keme qozǵalysy jeksenbi kúni is júzinde tolyq toqtap qalǵan. Bul aqparatty Bloomberg agenttigi teńiz tasymalyn baqylaý derekterine silteme jasap habarlaǵan.
Málimetke sáıkes, eger senbi kúni buǵaz arqyly eki baǵytta 9 keme ótken bolsa, jeksenbide tek eki ırandyq kommertsııalyq keme ǵana tirkelgen. Agenttik muny «buǵazǵa qoljetimdilik tek belgili bir aımaqtyq baılanysy nemese ruqsaty bar kemelermen shektelip otyrǵanyn» kórsetedi dep baǵalaıdy.
Sonymen qatar Bloomberg sońǵy aptalarda kóptegen kemeler transponderlerin óshirip ótetinin atap ótedi. Ásirese, AQSh Áskerı-teńiz kúshteriniń teńiz blokadasy aıasynda keıbir ırandyq kemeler Ońtústik-Shyǵys Azııa sýlaryna jetkende ǵana taratqyshtaryn qosatyny aıtylǵan.
Agenttik Tramptyń málimdemesinen keıin Ormýz buǵazynda erkin keme qatynasynyń tez qalpyna keletinine degen úmit álsiregenin jazady.
Eske sala keteıik, buǵan deıin AQSh-tyń Iranǵa qarsy engizgen teńiz blokadasy Tegeranǵa shamamen 4,8 mlrd dollar kóleminde ekonomıkalyq shyǵyn ákelgenin jazdyq.
