Shańyraq kúni: Astanada otbasylyq estafeta ótti
ASTANA. KAZINFORM - Naýryznamanyń onkúndigi aıasynda atalyp ótetin Otbasy kúnine oraı elordada «Kóńildi start» atty otbasylyq estafeta ótti, dep habarlaıdy Astana ákimdiginiń resmı saıty.
Shańyraq kúni – otbasylyq dástúrlerdi dáripteıtin kún. Ataýly dataǵa oraı Astana kásiptik-tehnıkalyq kolledjinde sporttyq shara ótip, jas otbasylardyń basyn qosty. «Otbasy – baqyt mekeni» uranymen ótken jarysty elordalyq jastar saıasaty máseleleri basqarmasy otbasylyq qundylyqtardy nasıhattaý, sport rýhyn damytý jáne salaýatty ómir saltyn nasıhattaý maqsatynda uıymdastyrdy.
Estafeta eki kezeńnen turdy: irikteý jáne fınal. Oǵan erli-zaıyptylardyń biri 35 jasqa tolmaǵan otbasylar qatysty. Mindetti sharttardyń biri – ulttyq kıimmen qatysý boldy.
– Bul estafeta jyl saıyn ótkiziletindikten jaqsy dástúrge aınaldy. Onyń basty maqsaty – qalamyzdaǵy jas otbasylar arasynda Naýryz meıramyna oraı otbasy qundylyqtaryn nasıhattaý, otbasy ınstıtýtyn nyǵaıtý, qazaqtyń ulttyq oıyndaryn damytý, salaýatty ómir saltyn nasıhattaý. Bıyl 20-dan astam otbasy qatysyp, erekshe ótti. Bul kún barlyq qatysýshyǵa umytylmas áser qaldyrdy dep senemiz, - dep atap ótti Jastar saıasaty máseleleri basqarmasynyń bas mamany Baljan Qolǵanat.
Estafeta jeńimpazdary aqshalaı syılyqtarmen marapattaldy: birinshi oryn – 200 000 teńge, ekinshi oryn – 150 000 teńge, úshinshi oryn – 100 000 teńge. Belsendilik tanytqan otbasylarǵa 20 000 teńgeden syıaqy berildi.
– Bul estafetaǵa birneshe jyldan beri qatysyp kelemiz. Júlde utyp alǵan kezimiz de boldy, al endi birde qatysqanymyzdyń ózinen lázzat alamyz. Bul bizdiń otbasymyz úshin jaqsy dástúrge aınaldy. Otbasy qundylyqtary men ulttyq mádenıetti osyndaı oıyndar arqyly damıtyny qýantady, - deıdi estafetaǵa qatysýshy Meıramhan Tillaev.
Buǵan deıin shańyraq kúnine oraı týystyq qarym-qatynastaǵy basty qaǵıdalar týraly jazǵan edik.