Shákirtimdi tennıs bıiginen kórgim keledi – bapker

ASTANA. KAZINFORM – Jýyrda qazaqstandyq tennısshi, 19 jastaǵy Sandýǵash Kenjebaeva juptyq synda Túrkııadaǵy týrnırde qatarynan úsh ret chempıon atanǵan edi. Osyǵan oraı Kazinform tilshisi Sandýǵashtyń bapkeri Artýr Haırýtdınovpen suhbattasty.

- Artýr Rýstamovıch, Sandýǵashty qaı kezden beri jattyqtyryp kelesiz?

- Meniń Sandýǵashty baptap kele jatqanyma kóp bola qoıǵan joq. Team Kazakhstan akademııasynda ózim jattyqtyrýshylyq qyzmetti 2023 jyldyń jazynan bastadym. Al Sandýǵashpen ótken jyldyń naýryzynan beri birgemiz. Qazir Astanadamyz. Bári qalypty, jattyǵý oıdaǵydaı ótýde. 

- Alda qandaı jarystar bar?

- Eresekter arasynda Qazaqstan chempıonatyna qatyspaqshymyz. Sodan keıin Taıland elinde ótetin birneshe halyqaralyq týrnırde baq synaımyz. Bıylǵy maqsatymyz – álemdik reıtıngide barynsha joǵary kóterilý, ITF WOMENS jarystarynda jekeleı synda alǵashqy tıtýldy jeńip alý. 

Aldaǵy bes jylda meniń shákirtim Sandýǵash Kenjebaeva WTA reıtıngisinde TOP-100-ge ense eken deımin. Ol – óte talantty jáne eńbekqor oıynshy. Sandýǵash tennıs bıiginen kórinip jatsa, bul men úshin úlken qýanysh bolmaq.

- Siz nebári 20 jastasyz. Aqtóbede tennıs álippesin úırenip, birneshe jyl buryn jasóspirimder arasynda ITF reıtıngisinde 258-orynǵa kóterildińiz. Jalpy, sporttyq jolyńyz neden bastalyp edi?

- Men 2008 jyly 4,5 jasymda Aqtóbe qalasyndaǵy «Nursat» mektepke deıingi bilim berý ortalyǵynda «10 jasqa deıingi tennıs» baǵdarlamasy boıynsha Galına Kýhtınanyń basshylyǵymen tennıspen tanystym. Keıin muny oblystyq balalar-jasóspirimder sport mektebinde jalǵastyrdym. Borıs Kvak pen Nellı Kvak alǵashqy bapkerlerim boldy. 2013 jyly Sergeı Kvaktyń tobyna qosyldym. Sodan keıin kásibı tennısshi retindegi jolym bastalyp, alǵashqy dodalarǵa qatysyp, reıtıngilik upaı jınadym. Maǵan tennıs oınaý árqashan unaıtyn.

Korttaǵy jattyǵýlardan bólek, teorııalyq sabaqtar da az bolmaıtyn. Onda taktıka quryp, kortta jáne odan tys jerde ózińdi ustaý erejesin úırendik. Sol kezde Aqtóbede básekelestik joǵary boldy. Bárimiz de ozyq shyǵý úshin tyrysatynbyz.

- Endeshe, sporttyq jolyńyzdy nege erte aıaqtadyńyz?

- Men úsh ret ota jasattym. Sonyń árqaısysynan keıin jyl jarym ýaqyt boıy qalpyma kelý kerek boldy. Futures M15 sanatyndaǵy birneshe jarysta úzdik shyqtym, eresekter arasynda Qazaqstan chempıonatynda juptyq synda jeńimpaz atandym.

Biraq tizemniń aýyratyny, ásirese, jekeleı syndaǵy matchtarda qozǵalýǵa qıyndyq keltirdi. Bul ómirimdegi kúrdeli kezeń edi, armanymnan bas tartýǵa týra keldi. Ata-anam, bapkerlerim, Team Kazakhstan akademııasy jáne Qazaqstan tennıs federatsııasy basshylyǵymen sóıleskennen keıin 2023 jyly sporttyq mansabymdy aıaqtap, bapkerlik baǵytqa bet burdym. 

- Jas jattyqtyrýshy retinde qandaı máselege mańyz berý kerek dep oılaısyz?

- Qazirgi tańda jattyǵý bolsyn, jarys bolsyn, men ár kúnimnen qanaǵat alamyn. Ásirese, óziń baptaıtyn shákirtiń alǵa ozsa, tabysqa jetse, qýanyshyń eselene túsedi. Bilikti bapker bolý úshin únemi úırenip, damý óte mańyzdy. Biliktilikti arttyrý kýrstaryna baryp, belgili akademııalarda bilimimdi jetildirgim keledi. Álemdegi myqty bapkerlerdiń tájirıbesin alǵym keledi. Eń bastysy, bir orynda turyp qalmaı, alǵa jyljı berý kerek dep esepteımin.

- Áńgimeńizge rahmet. Shákirtińizben birge tabysqa jetýińizge tilektespiz.

Eske sala keteıik, budan buryn Sandýǵash Kenjebaevanyń úsh ret qatarynan Túrkııadaǵy týrnırde úzdik atanǵanyn jazǵan bolatynbyz.