Serik Saırov «Qazsýshar» ǴZI bas dırektory bolyp taǵaıyndaldy
ASTANA. KAZINFORM — Sý resýrstary jáne ırrıgatsııa mınıstriniń buıryǵymen Serik Saırov Qazaq sý sharýashylyǵy ǵylymı-zertteý ınstıtýtynyń (QazSShǴZI) bas dırektory bolyp taǵaıyndaldy.
Mınıstr búginge deıin QazSShǴZI-diń bas dırektory qyzmetin atqaryp kelgen Nurlan Nurmahanulyn «Eńbek ardageri» medalimen marapattady. Tájirıbeli maman ınstıtýtta qyzmetin aǵa ǵylymı qyzmetker retinde jalǵastyrady.
Serik Saırov — qurlyq gıdrologııasy, gıdrologııalyq esepteýler jáne sý resýrstaryn baǵalaý salasyndaǵy bilikti maman.
Ol 1994 jyly ál-Farabı atyndaǵy Qazaq ulttyq ýnıversıtetin «Qurlyq gıdrologııasy» mamandyǵy boıynsha támamdaǵan. 2007 jyly qurlyq gıdrologııasy, sý resýrstary jáne gıdrohımııa baǵyty boıynsha geografııa ǵylymdarynyń kandıdaty ǵylymı dárejesin aldy.
2017 jyly Abaı Myrzahmetov atyndaǵy Kókshetaý ýnıversıtetiniń magıstratýrasyn «Qarjy» mamandyǵy boıynsha bitirgen.
Eńbek jolyn 1994 jyly QR UǴA Geografııa ınstıtýtynyń glıatsıologııa zerthanasynda I sanatty ınjener bolyp bastaǵan. Ár jyldary S. Amanjolov atyndaǵy Shyǵys Qazaqstan memlekettik ýnıversıtetinde geografııa kafedrasynyń oqytýshysy, sondaı-aq «Jer kadastrynyń ǵylymı-óndiristik ortalyǵy» RMK Shyǵys Qazaqstan fılıalynyń dırektory jáne birinshi dırektordyń orynbasary qyzmetterin atqarǵan.
2007 jyldan bastap «Qazgıdromet» RMK qurylymynda eńbek etti. Onda ol Shyǵys Qazaqstan oblysy boıynsha fılıal dırektory, Almaty qalasy boıynsha fılıal dırektory, Gıdrologııa departamentiniń dırektory, Ǵylymı-zertteý ortalyǵynyń dırektory jáne kásiporyn bas dırektorynyń orynbasary qyzmetterin atqardy.
2023 jyldan bastap osy ýaqytqa deıin «Qazgıdromet» RMK bas dırektorynyń birinshi orynbasary bolyp jumys istedi. Serik Saırov — Qazaqstan Respýblıkasynyń Dúnıejúzilik meteorologııalyq uıym janyndaǵy turaqty ókiliniń gıdrologııa jónindegi keńesshisi, Kaspıı teńizi boıynsha gıdrometeorologııa jónindegi úılestirý komıtetiniń qazaqstandyq ókili, sondaı-aq Azııa óńirlik qaýymdastyǵynyń Ortalyq Azııa sýbóńiri boıynsha gıdrologııa jáne sý resýrstary máseleleri jónindegi úılestirýshisi. Ol Qazaqstan men Qytaı arasyndaǵy shekaralyq ózenderdi paıdalaný jáne qorǵaý jónindegi birlesken komıssııanyń sarapshylar tobynyń múshesi, «Gıdrometeorologııa jáne ekologııa» jýrnaly bas redaktorynyń orynbasary jáne «Qazgıdromet» RMK Ǵylymı-tehnıkalyq keńesiniń tóraǵasy. Ol — sý taqyryby boıynsha 20-dan astam ǵylymı jazbanyń, sonyń ishinde monografııalardyń avtory jáne birlesken avtory.
2016 jyly ol «Eren eńbegi úshin» medalimen marapattalǵan.