Senator omartashylardyń qazirgi problemalaryn aıtty
ASTANA. KAZINFORM — Senator Zakırjan Kýzıev óziniń depýtattyq saýalynda qazaqstandyq omartashylardyń problemasyn jarııa etti jáne ol salanyń damý qarqynynyń báseńdeýi men ónim sapasynyń tómendeýine ákelýi múmkindigin aıtty.
Senatordyń aıtýynsha, elimizdegi omartashylardyń áleýeti zor bolsa da, qıyndyqqa tap bolǵan. Importtan baj salyǵynsyz keletin jáne sapasy tekserilmeı shekaradan ótetin bal tutynýshylardyń densaýlyǵy men jergilikti ónim óndirýshilerge qaýip tóndirip otyr. Aýrý týǵyzatyn arany zańsyz ákelý bizdegi aranyń tuqymyn joıyp jiberetin keneniń paıda bolýyna sebep bolǵan. Sonymen qatar, kúmándi hımııalyq zattardy qoldaný jaǵdaıdy nasharlatyp keledi jáne memlekettik qoldaý baǵdarlamasynyń bolmaýy salany damytýǵa múmkindik bermeı jatyr.
Onyń sózine qaraǵanda, 2023 jyly Qazaqstan 4 myń tonnadan astam bal ónimin óndirdi, biraq eksport tek 222 tonnany ǵana qurady, bul jalpy kólemniń 5% qurady.
Buden bólek, Reseıdegi baldyń sapasyna qoıylatyn talaptardyń kúsheıtilýi jaǵdaıdy ýshyqtyrýy múmkin. 1 qyrkúıekten bastap Reseıde «bal» uǵymy belgilendi, al 1 jeltoqsannan bastap tekserýler bastalady. Zertteýler boıynsha Reseıdegi baldyń 38 paıyzy jalǵan ekenin eskere otyryp, sapasyz baldyń Qazaqstanǵa kelý yqtımaldyǵy arta túsedi.
«Ara sharýashylyǵyn qoldaý jóninde memlekettik baǵdarlama qabyldaýdy suraımyz, oǵan qarjylandyrý, oqytý jáne ǵylymı zertteý sharalaryn da qosý kerek. Bal ımportyna qatań baqylaý ornatý, sertıfıkattaýdy mindetteý jáne standartqa sáıkes zerthanalyq zertteýler engizý kerek. Veterınarlyq jáne sanıtarlyq baqylaýdy da, zııankestermen kúresti de kúsheıtý kerek. Sondaı-aq, «bal» uǵymyn bekitý jáne jalǵan ónimmen kúres úshin «Bal ara sharýashylyǵy týraly» zańǵa túzetýler ázirleý mańyzdy. Baldy sáıkestendirýdiń ulttyq standartyn qabyldaý, sondaı-aq naryqtyń ashyqtyǵyn arttyrý úshin óndirýshiden tutynýshyǵa deıin baldy jetkizýdi baqylaýdyń elektrondyq júıesin engizý qajet», - dedi Zakırjan Kýzıev Úkimet basshysy Oljas Bektenovtiń atyna joldaǵan saýalynda.
