Senator aýyldaǵy mal dárigerleriniń problemasyn kóterdi
ASTANA. KAZINFORM – Senat depýtaty Olga Býlavkına aýyldaǵy jas veterınarlarǵa qoldaý kórsetýdi usynyp, depýtattyq saýal joldady.
Senatordyń málimdeýinshe, adam men janýarlar álemine, búkil ekojúıeniń ál-aýqatyna veterınarııa salasy tikeleı baılanysty, alaıda, salany damytýǵa qarjy az bólinedi. Aýyldaǵy mal dárigerleriniń jalaqysy tómen, eńbek jaǵdaıy aýyr, ınfraqurylymy álsiz, ıaǵnı jaǵdaı qıyn.
— Bıýdjet qarjysyn bólý deńgeıi nashar, veterınarııa salasyndaǵy keıbir fýnktsııalardy bıýdjettiń bir deńgeıinen ekinshisine birneshe ret berý saldarynan elimizdegi veterınarııa stantsııalarynyń 36%-y jáne veterınarııa pýnktteriniń 77%-y ǵımaratynan aırylyp qaldy. Al 70%-dan astam arnaıy tehnıka tozǵan. Qalaǵa qaraǵanda aýyldyq jerdegi veterınar mamandardyń jalaqysy edáýir tómen. Joǵary bilimi bar jas mamandar shamamen 190-230 myń teńge alady. Veterınarlar bul rette ondaǵan eldi mekenge qyzmet kórsetýge májbúr, al onda ınfraqurylym joqtyń qasy, — deıdi Olga Býlavkına Senatta depýtattyq saýal joldaı otyryp.
Sonymen qatar halyq qalaýlysy aýyldaǵy mal dárigerlerdiń ortasha jasy zeınetke taıaǵanyn tilge tıek etti.
— Janýarlardan aýrý juqtyrý qaýpi joǵary, áleýmettik qoldaýdyń joqtyǵy, veterınarlyq, medıtsınalyq jáne ekologııalyq qyzmet arasyndaǵy úılestirýdiń nasharlyǵy jaǵdaıdy ýshyqtyryp barady, — dep tolyqtyrdy Olga Býlavkına.
Osy oraıda senator veterınar mamandaryn daıarlaý jónindegi bıýdjet qarjysynyń tıimdiligine taldaý júrgizýge jáne oqý baǵdarlamalarynyń salanyń muqtajyna qanshalyqty sáıkes keletinin anyqtaýdy usyndy. Sondaı-aq zamanaýı jabdyqpen jáne jattyǵý qurylǵysymen qamtamasyz etý arqyly kolledjderdi jańartý kerek.
Onyń aıtýynsha, jaǵdaı jasalsa jas mamandar aýyldan shyqpaı-aq sapaly bilim ala alady.
Olga Býlavkına odan bólek, mamandardy qaıta daıarlaýǵa maqsatty grant engizýdi, jyljymaly veterınarııa emhanasyn qurýdy jáne aýylda jumys isteýdi josparlap otyrǵan túlekterdiń stıpendııasyn arttyrýdy usyndy.
Sáýirde Jambyl oblysynyń veterınarııalyq pýnkt salý tájirıbesi respýblıkaǵa taralatyny týraly habarlaǵan edik.
Aıta keteıik, bıyl 8 naýryz halyqaralyq áıelder meıramynda 20 jylǵa jýyq eńbek ótili bar mal dárigeri Prezıdent qolynan «Shapaǵat» medalimen marapattaldy.