Elimizde jattyǵý zaly abonementiniń ortasha baǵasy qansha
ASTANA. KAZINFORM – Jaz jaqyndaǵanda adamdar dene bitimine kóńil bólip, jattyǵýdy arttyrady. Ásirese fıtnes zaldaryna barǵandy unatady. Bul qyzmet úshin keıbir óńirde kóp shyǵyndalýǵa týra keledi, dep habarlaıdy Kazinform agenttiginiń tilshisi.
Baǵa qalaı túziledi
Fıtnes klýby pen jattyǵý zaly qyzmetiniń baǵasyna birneshe faktor áser etedi. Aldymen baratyn jerińizdiń deńgeıi mańyzdy. Aty kópke málim, keń tanymal jattyǵý zaldarynyń baǵasy da joǵary bolady. Al ishindegi jattyǵý oryndarynyń ózgeden aıyrmashylyǵy sezile bermeıdi. Sonymen birge abonement baǵasy aıyna neshe kún zalǵa baratyńyzǵa da baılanysty. Eń kóp taralǵany aıyna 8, 10 jáne 12 jattyǵý. Eger fıtnes zalǵa barmasańyz, bar aqshańyz kúıip ketedi. Sonymen birge lımıtsiz qyzmet te bar. Onyń baǵasy ózgege qaraǵanda joǵary. Taǵy bir aıta keterlik jaıt, keıbir zalda baǵa kúndizgi jáne keshki bolyp ekige bólinedi. Arnaıy áıelderge, erlerge bólek qyzmet kórsetetin jabyq fıtnes klýbtar da suranysqa ıe. Eger qosymsha qyzmet, máselen, saýna bolsa quny kóterile beredi. Jeke jattyqtyrýshy qyzmetiniń quny onyń qanshalyqty tanymal ekenine baılanys bolady. Jattyqtyrýshy neǵurlym tanymal bolsa, baǵasy óse beredi. Al qyzmetin jańa bastaǵan jas jattyqtyrýshylar aıyna 15-20 myń teńge alady, keıbiri bir ǵana jattyǵýǵa osy aqyny suraıdy. Qazirgi kezde elimizdiń barlyq qalasynan janyńyzǵa qalaǵan, ózińizge unaǵan jattyǵý zalyn taba alasyz.
Jattyǵý baǵasy
Baǵany salystyrý úshin aı saıyn 8, 10 jáne 12 jattyǵýy bar abonementti tańdadyq. Eń arzany Qyzylorda qalasynda. Munda abonement baǵasy 5 000 teńgeden bastalady, keıbirinde 25 000 teńge bolyp tur. Odan keıingi orynda Taraz ben Pavlodar qalalary tur. Munda aı saıynǵy jattyǵý qyzmetiniń quny 6 000 teńge jáne odan joǵary. Óskemen men Astana qalasynda da baǵa alysqa ketpedi, bir adamǵa abonement baǵasy 7 000 teńge jáne odan joǵary. Elordada keıbir fıtnes klýby men jattyǵý zalynyń aı saıynǵy qyzmeti keıde 50 000 teńgege jetedi. Odan da qymbaty tabylady.
Túrkistan, Aqtóbe, Qaraǵandy men Jezqazǵanda abonement baǵasy 8 000 teńgeden bastalady. Petropavlda 9 000 teńdeden bastap, keıbirindegi baǵa 17 000 teńgege jetti.
Jalpy Qazaqstan boıynsha eń keń taraǵan ári tómen baǵa – 10 000 teńge. Mundaı baǵa Shymkent, Semeı, Qostanaı, Atyraý, Oral men Almatyda tirkeldi. Elordadaǵy sekildi elimizdiń ońtústik astanasynda da baǵa keıde birneshe ondaǵan myńǵa jetedi. Munda jattyǵý zaly, fıtnes zaly óte kóp ári qaladaǵy shaǵyn aýdandardyń bárinde bar.
Aqtaý qalasynyń jóni bólek. Munda bir aılyq abonement baǵasy 11 000 – 25 000 teńge aralyǵynda. Al Kókshetaý qalasynda baǵa 12 000 – 27 000 teńge aralyǵynda bolyp tur. Taldyqorǵan qalasyndaǵy abonement baǵasy bárinen joǵary. Munda aı saıynǵy qyzmet quny – 16 000 – 25 000 teńge aralyǵynda.
Buǵan deıin kilem jýý jáne avtokólik jýý qyzmetiniń quny týraly bildik.
