Senator astanalyq stýdentterge Prezıdent reformalarynyń mánin túsindirdi
Sharaǵa bilim ornynyń stýdentteri, oqytýshylar, ǵalymdar qatysty. Suhbat-áńgime formatynda ótken sharada, jastar Parlament ókilderine eldiń keleshegi, jastardy qoldaýǵa arnalǵan memlekettik baǵdarlamalar, qazaq tiliniń taǵdyry sııaqty taqyryptar boıynsha suraq qoıdy.
Al senatorlar eldegi jańa saıası baǵyt týraly áńgime órbitip, jastardy osy ózgeristerdiń bárine sergek qarap, tyń bastamalar usynýǵa shaqyrdy.
«Shyn máninde búgin biz kúrdeli, aýyrtpalyǵy úlken syn kezeńge tap kelip otyrmyz. Bul tek Qazaqstannyń basyna basyna ǵana túsip otyrǵan syn sát emes. Búkil álemde óte kúrdeli geosaıası, geoeonomıkalyq ózgerister júrip jatyr. Bul ýaqyt, bul kezeń memleketimizdiń damýyndaǵy jańa bir saty ǵoı dep oılaımyn. Ótken 30 jylda egemendiktiń berik irgetasy qalandy.
Biraq ómir bir ornynda turmaıdy. Alǵa jyljyp, jańa mindetter men maqsat-murattar jolynda ósip-ónýimiz kerek. Qazirgi ýaqyt aldymyzǵa qoıyp otyrǵan eń úlken talap – sapanyń, bilim men biliktiliktiń, básekeniń talaby. Jańa Qazaqstandy qurý jónindegi úlken maqsat aldymyzda tur. Elimizdiń aldynda turǵan eń basty maqsat – egemendigimizdi, eldigimizdi, memlekettigimizdi odan ári tuǵyrly etip, jańa baǵyttyń, jańa zamannyń talabyna saı, jańa tıptegi, jańa úrdistegi memleket qurý», - dedi senator Beıbit Isabaev.
Al Aqylbek Kúrishbaevtyń aıtýynsha, elimizde kúrdeli saıası, ekonomıkalyq ózgerister bastaldy.
«Jańa Qazaqstandy, buıyrsa, quramyz, Ádiletti qoǵam bizde bolady. Biraq sonyń bárin retpen keltirýimiz kerek, Evolıýtsııalyq jolmen, aqylmen isteý qajet. Áleýmettik jelini ashyp qalsań, neshe túrli pikirler bar. Qyryq pyshaq bolyp jatyrmyz qazir. Blogerler sondaı ortada pikir qalyptastyryp jatyr. Álemde neshe túrli qorlar bar. Sol qorlardan aqsha alatyn blogerler bar», - degen Senat depýtaty Jańa Qazaqstan ekonomıkany olgarhııalyq júıeniń yqpalynan azat etkende ǵana quralytynyn atady.
«Olıgrahtardyń ekonomıkasyn qıurtamyz, ádiletti Qazaqstan qalyptastyramyz dep jatyrmyz. Saraptamalyq málimet boıynsha, bizdiń ekonomıkamyzdyń 55 protsenti 162 otbasyǵa tıesili eken. Prezıdent osyndaı olıgapolııaǵa jol berilmeıtinin, orta jáne shaǵyn bıznesti damytýǵa basymdyq beriletinin aıtty. Árıne, ashyǵyn aıtsaq, ondaı ustanym álgi baılarǵa unamaıdy. Jınaǵan baılyǵyn ońalıyqpen bere salǵysy kelmeıdi. Solardyń qolshoqparlary paıda boldy. Ony da jastar bilýi kerek. Olar qazir úgittep, aramyzǵa iritki salyp, ótirik áńgimelermen resmı bılikke, reformalarǵa qarsy shyǵyp jatyr. Osy dúnıeniń bárin oılanyp júrý kerek», - dedi senator.
