Senat «Mass-medıa týraly» zańdy maquldady

ASTANA. KAZINFORM –  Parlament Senaty Mass-medıa týraly Májilis qabyldaǵan negizgi zańdy maquldady.

Palatanyń Áleýmettik-mádenı damý jáne ǵylym komıtetiniń múshesi Aıgúl Qapbarovanyń aıtýynsha, «Mass-medıa týraly» zańǵa mynandaı jańashyldyqtar engizý kózdelgen:

Birinshi, memlekettik emes buqaralyq aqparat quraldaryna otandyq kontentti damytý, Qazaqstan Respýblıkasynyń aqparattyq egemendigin nyǵaıtý jáne qorǵaý úshin granttyq qarjylandyrý beriletin boldy;

Ekinshi, buqaralyq aqparat quralynda jarııalanǵan aqparattar boıynsha jeke nemese zańdy tulǵalardyń talap qoıý merzimi bir jyl bolyp belgilendi;

Úshinshi, BAQ suraýlaryn qaraý merzimi 7 jumys kúnnen 5 jumys kúnine deıin qysqartyldy;

Tórtinshi, BAQ qyzmetine ózin-ózi retteýge, medıa salany damytýǵa múmkindik berý maqsatynda erikti negizde qoǵamdyq-kásiptik keńes qurýǵa jáne jýrnalısterdiń ádep kodeksin ázirleýge múmkindik berildi;

Besinshi, Memlekettik tildegi tele, radıobaǵdarlamalardyń apta saıynǵy kólemin 50% - dan 60% - ǵa deıin kezeń-kezeńimen ulǵaıtý belgilendi (2025 jyldan bastap 55%, 2027 jyldan bastap 60%); Altynshy, otandyq tele, radıo baǵdarlamalardyń jáne qazaqstandyq avtorlardyń/oryndaýshylardyń mýzykalyq shyǵarmalarynyń otandyq tele, radıoarnalardaǵy kólemin 50% - dan 60% - ǵa deıin kezeń-kezeńimen ulǵaıtý (2025 jyldan bastap 55%, 2027 jyldan bastap 60%) kózdeldi;

Jetinshi, otandyq tele, radıoarnalardaǵy sheteldik baǵdarlamalardyń retranslıatsııasyn 20% - dan 10% - ǵa deıin azaıtý% belgilendi;

Segizinshi, jýrnalıstiń kásibı qyzmetiniń quqyqtyq kepildikterin qamtamasyz etý jóninde normalar engizildi.

Sondaı-aq, ol qoldanystaǵy ulttyq zańnamada kezdesetin «buqaralyq aqparat quraldary» sózi «mass-medıa» sózimen aýystyrylatynyn atap ótti.