Semeıde polıtsııa kórmesi uıymdastyryldy
SEMEI. KAZINFORM – Semeı qalasyndaǵy Abaı alańynda «Zań men Tártip» atty fotokórmeniń saltanatty ashylýy ótti, — dep jazdy Polisia.kz.
«Zań men Tártip» tujyrymdamasyna arnalǵan bul kórme qala turǵyndary men qonaqtarynyń nazaryn aýdaryp, olarǵa polıtsııa qyzmetin bolǵan oqıǵalar, emotsııalar men erliktiń jarqyn mysaldary arqyly kórýge múmkindik berdi. Fotokórmede polıtsııa qyzmetiniń alýan túrli qyrlaryn beıneleıtin erekshe jumystar qoıylǵan: qoǵamdyq tártipti saqtaý, kúndelikti qyzmet, halyqpen senimdi dıalog, jedel aldyn alý sharalaryna qatysý, sondaı-aq adam ómiri tarazyǵa túskendegi batyrlyq sátter.
Kórmedegi sýretterdiń biri Talıtsa aýylyndaǵy orman órti kezinde túsirilgen. Polıtsııa qyzmetkerleri turǵyndardy evakýatsııalap jatqanda, bir áıel adam úıinen ketýden bas tartyp, kúıeýi men ormanda júrgen ulyn kútemin dep turyp alǵan. Qoıý tútin arasynda kóz jasyna malynǵan jandy uzaq úgitteýden keıin ol aqyry ketýge kelisedi. Bul foto senim men qutqarýdyń sımvolyna aınaldy.
Taǵy bir kópshilikke áser etken sýret – Jarma aýdanynan. Dala órti bastalǵanda, polıtseıler TJ qyzmetkerlerimen birge ot shebine qaqqysh pen kúrekpen shyqqan. Sýrette sharshaǵan, kúıe basqan jas ofıtser alǵa qaraı kele jatqan beınesi beınelengen.
Abaı oblysy polıtsııa departamenti bul kórmeniń maqsaty halyqqa qyzmet etýdiń mańyzdylyǵyn kórsetý jáne azamattardyń tynyshtyǵy men qaýipsizdigi úshin qyzmet etetin adamdardyń jumysyna tártip, erlik pen adaldyq qajet ekenin eske salý ekenin atap ótti.
Fotokórme ashyq aspan astynda ótti, bul kez kelgen qalaǵan adamǵa polıtsııa qyzmetiniń shynaıy sátterin kórip, jaýapkershilik, erlik pen abyroı rýhyn sezinýge múmkindik berdi.
Aıta keteıik, 17 qyrkúıek kúni Almatyda Ortalyq Azııadaǵy eń iri kórme bastalady.