Saılanǵan Prezıdenttiń ant berý kúni naqtylanady – Erlan Sársembaev

ASTANA. KAZINFORM – Saılanǵan Prezıdenttiń ant berý kúni saılaý nátıjeleri jarııalanǵan kúnge baılanysty aıqyndalady. Bul týraly Konstıtýtsııalyq reformalar jónindegi komıssııanyń ekinshi otyrysynda Ádilet mınıstri Erlan Sársembaev aıtty.

- Saılaý ótkizý merzimi men tártibin ózgertý Prezıdenttiń ant berý ýaqytyna da tıisti túzetýler engizýdi talap etedi. Osyǵan baılanysty Konstıtýtsııanyń tıisti babynda kórsetilgendeı, ant saılaý qorytyndysy jarııalanǵan kúnnen bastap, 1 aı ishinde beriledi. Bul normamen de naqty kúntizbelik kúnnen bas tartylyp, ant berý kúni saılaý nátıjeleri jarııalanǵan kúnge baılanysty aıqyndalady. Sondaı-aq Prezıdenttiń merzimnen buryn qyzmetinen bosatylýy, qyzmetinen shettetilýi nemese qaıtys bolý jaǵdaılary eskerilgen qoldanystaǵy normalarǵa sáıkes, Prezıdenttiń ókilettigin ózine qabyldaǵan tulǵa antty 1 aı ishinde berýi tıis, - dedi Erlan Sársembaev.

Onyń atap ótýinshe, naqty merzimniń belgilenýi quqyqtyq belgisizdikti boldyrmaıdy jáne ókilettikke kirisý rásiminiń sozylyp ketýiniń aldyn alady.

- Osylaısha, jedeldik pen legıtimdilik arasyndaǵy tepe-teńdikti qamtamasyz etedi. Bir jaǵynan basqarý júıesinde bılik vakýmy týyndamaıdy. Ekinshi jaǵynan joǵary memlekettik ókilettikterdi qabyldaıtyn árbir tulǵa halyq aldyndaǵy jaýapkershiligin jarııa túrde konstıtýtsııalyq rastaý rásiminen ótedi, - dedi mınıstr. 

Buǵan deıin ol Prezıdentke qandaı laýazym ıelerin taǵaıyndaý quqyǵy beriletinin aıtqan edi.