Sarbazdar qarbalastan qalypty tirlikke orala bastady
ASTANA. KAZINFORM – Búginde keıbir aımaqtarda sý tasqynynyń beti qaıtyp, Qarýly kúshterdiń jeke quramy men áskerı tehnıkasynyń bir bóligi Batys Qazaqstan, Soltústik Qazaqstan jáne Aqmola oblystarynan turaqty ornalasý pýnktine qaıtarylǵan. Bul týraly ortalyq kommýnıkatsııalar qyzmetinde ótken brıfıngte QR Qorǵanys mınıstrliginiń resmı ókili Rýslan Jangýlın aıtty.
Sarbazdar ájeptáýir jumysty atqarǵanyn atap ótken jón.
Máselen, Jaıyq ózeniniń jaǵalaýyn nyǵaıtý jumystary júrgizilip, Qulsary kentinde 2 myń metrlik jaǵalaý aýmaǵy tazartyldy.
«Basshy ata» ortalyq zıratynyń, №15 orta mektebiniń jáne turaqty sý qory saqtalǵan alańdardyń aýmaǵyna dezınfektsııa júrgizildi.
«Aqtóbe oblysynda Oıyl ózeni arqyly jergilikti halyqty, tehnıka men júkterdi parommen jetkizý jáne tasymaldaý jalǵasyp jatyr. Ótken táýlikte 5 paromoreıs oryndalyp, 17 kólik, 20 adam jáne 2 tonna júk tasymaldandy. Jaısańbaı aýylynda jaǵalaýdy nyǵaıtý jumystary jalǵasýda. Aqtóbe qalasynda radıatsııalyq-hımııalyq jáne bıologııalyq qorǵaý bólimshesiniń mamandary áleýmettik mańyzy bar obektilerge dezınfektsııalaý jumystaryn júrgizip jatyr», – dedi Rýslan Jangýlın.
Soltústik Qazaqstan oblysynda áskerı qyzmetshiler Petropavl qalasynda, Beskól kentinde jáne Smırnov aýylynda gýmanıtarlyq kómekti túsirýge atsalysqan.
Áskerı paromdarmen 2 reıs jasalyp, Prıbrejnyı aýylyna 326 adam jetkizildi.
Aqmola oblysynda áskerı qyzmetshiler Esil aýdanynyń Zarechnyı kentindegi ákimdikti, sý sorý stantsııasyn, ashana men naýbaıhanany elektrmen qamtamasyz etti.
27 naýryz ben 29 sáýir aralyǵynda sý tasqynyna qarsy is-sharalarǵa Qarýly kúshterdiń jeke quramynan 6 153 adam, 255 tehnıka, armııalyq avıatsııanyń 12 tikushaǵy men 5 áskerı-kóliktik ushaǵy jumyldyrylǵanyn atap ótken jón.
