Samuryq-Qazyna dıvıdend tóleýdi 2 ese arttyrmaq

NUR-SULTAN. QazAqparat – «Samuryq-Qazyna» UÁQ» AQ dıvıdent boıynsha tólem mólsherin eki ese arttyrýdy josparlap otyr. Bul jaıynda atalǵan qordyń strategııa jáne aktıvterdi basqarý jónindegi basqarýshy dırektory Ernat Berdiǵulov málim etti, dep habarlaıdy QazAqparat tilshisi.

«Dıvıdentterdiń eń tómendi deńgeıin arttyrý josparlanyp otyr. Eger 2022 jyl jaıynda aıtar bolsaq, onda buǵan deıin shamamen 88 mlrd teńge dıvıdend tólengen bolatyn. Al bıyl tólem mólsherin 170 mlrd teńge deıin arttyrý kózdelgen», - dedi Ernat Berdiǵulov.

Sonymen qatar ol «Samuryq-Qazyna» qoryn damytýdyń jańa strategııasynda kózdelgen basty aspektilerge toqtalyp ótti. Onyń atap ótýinshe, eń aldymen qordy basqarý modeli ózgerdi.

«Qor aǵymdaǵy konıýtýrany jáne mandatqa sáıkes basty strategııalyq aktıvterdi basqarý qajettigin eskere otyryp, taıaý 5-6 jyldyń ishinde aktıvterdi strategııalyq basqarý modelin damytýdy jalǵastyrýy tıistigin kórip otyrmyz. Bul rette biz munan ary ınvestıtsııalyq holdıng modeline kezeń-kezeńmen kóshýdi júzege asyramyz», - dedi spıker.

Qordyń basqarýshy dırektory ekinshiden, otandyq bızneske qoldaý kórsetý jasalatyndyǵyn aıtty.

«ıAǵnı, biz otandyq bıznespen birge iri ınvestıtsııalyq jobalardy teń qarjylandyrýǵa, sonymen qatar bıznes úshin uzaqmerzimdi ofteık-kelisimsharttar usynýǵa daıynbyz. Buǵan qosa, «Samuryq-Qazyna» qory deńgeıinde sheteldik ınvestorlarmen úılestirý jumystaryn júzege asyrýdy kózdep otyrmyz», - dedi ol.