Salyq Keshbek: Chek surasań, syıaqy beredi
ASTANA. KAZINFORM — Qazaqstandyqtar shaǵyn dúkenderden chek talap etip, syılyq utyp ala alady. Bul úshin arnaıy Salyq keshbek memlekettik jobasy jumys isteıdi.
— Elimizde kásipkerler fıskaldy chekterdi bermeı, salyqtan qashady. Bul másele barlyq óńirde bar ekeni jasyryn emes. Biraq buǵan chek talap etpeıtin tutynýshylar da jaýapty. Sol úshin biz salyqtyq baqylaýdan bólek, azamattardy chek talap etýge yntalandyratyn ózge bir jolyn qarastyrýdy sheshtik, — deıdi QR QM MKK-niń arnaıy salyq rejımderin ákimshilendirý basqarmasynyń basshysy Erqanat Shynbergen Kazinform tilshisine bergen suhbatynda.
Salyq Keshbek pılottyq jobasy byltyr 15 tamyzdan bastalǵan. Alǵashynda Semeı qalasy men Aqmola oblysyndaǵy Aqkól aýdanynda júrgizilgen joba qazir 46 óńirde jumysyn jalǵastyryp jatyr.
— Áýeli, 15 tamyzdan jyl sońyna deıin 2 óńirde synaqtan ótkizdik. Osy kezeńde 2 aımaqtaǵy turǵyndardyń chek talap etýi edáýir ulǵaıdy. ıAǵnı, chekterdiń sany 2 esege artty. Al bıyl 46 aýdanda ázirlendi. Qazir tártiptiń 18 paıyzǵa artqanyn baıqap otyrmyz, — deıdi basqarma basshysy.
Amian qosymshasy arqyly fıskaldyq chektegi QR-kodty skanerleseńiz, saýdaǵa jumsaǵan qarjyńyzdyń 2 paıyzyn keshbek retinde qaıtarýǵa bolady. Bul shaǵyn jáne orta kásipkerlikten alynatyn fıskaldyq chekterge ǵana qatysty. Alaıda 1 aıda 70 chekten artyq tirkeı almaısyz. Eń kóp syıaqy mólsheri — 20 myń teńge.
— Jyl sońyna deıin osy pılottyq jobany múmkindiginshe kóp aýdandarda júzege asyryp, keıin Salyq kodeksine belgili bir ózgertýler engizý jáne osy jobany memleket deńgeıinde júrgizip, kassalyq tártip deńgeıin kóterýdi josparlap otyrmyz, — deıdi maman.
Bul jobanyń basty maqsaty — elimizdegi kassalyq tártipti saqtaý jáne onyń deńgeıin arttyrý. Dál osy sebepten Salyq Keshbekten bólek taǵy 3 joba jumys isteıdi.
— Budan ózge taǵy «Chekti talap et», «Báıge», «Ámııan jáne Halyq bank» pılottyq jobalary júzege asyrylyp jatyr. Nátıjesinde 200 myńnan astam turǵyn jobaǵa qatysyp, syıaqy alyp úlgerdi, — deıdi Erqanat Shynbergen.
Al jańa salyq kodeksine qatysty qandaı túsindirý jumystary júrgizilip jatqanyn bilgińiz kelse, siltemege ótińiz.