Saksonııada oqýshylarǵa mektepte smartfon paıdalanýǵa tyıym salynady
ASTANA. KAZINFORM — Aqpan aıynan bastap Germanııanyń shyǵysyndaǵy federaldyq jerlerdiń biri Saksonııada bastaýysh mektepterde smartfon qoldanýǵa tyıym kúshine endi.
Saksonııanyń Bilim mınıstrliginiń málimetinshe, jańa oqý jylynan bastap bul shekteý 8-synypqa deıingi barlyq oqýshy qamtylady.
Mınıstrlikte bul sharany 14 jasqa deıingi balalarǵa áleýmettik jelilerdi paıdalanýǵa tyıym salý bastamasymen úılestirý oryndy bolatynyn atap ótti. Qazirgi ýaqytta mundaı usynys Germanııa deńgeıinde talqylanyp jatyr.
Qazirgi kezde Germanııanyń kóptegen óńirinde oqýshylardyń smartfon qoldaný tártibin mektepterdiń ózderi retteıdi. Keıbir óńir bıligi tek smartfondy shekteý jóninde usynymdar ǵana shyǵarǵan. Al basqa óńirlerde sabaq kezinde qoldanýǵa tyıym salynǵanymen, úzilis kezinde paıdalanýǵa ruqsat etiledi.
Bastaýysh mektepterde smartfonǵa tolyq tyıym Germanııanyń 16 federaldyq jeriniń tórteýinde engizilgen. Olar — Bavarııa, Saksonııa, Saar jáne Tıýrıngııa. Al Gessen men Bremende telefon qoldanýǵa tyıym joǵary synyptarǵa da qatysty.
Aıta ketelik elde Oqý-aǵartý mınıstrligine mektepterde smartfondardy paıdalanýǵa tolyq tyıym salý quzyreti berilmek.