Rımdegi áıgili Trevı sýburqaǵyn kórý endi aqyly bolmaq

ASTANA. KAZINFORM – Italııa astanasynyń týrıstik orny sanalatyn «Trevı sýburqaǵy» týrıster úshin aqyly bolady, dep habarlaıdy Kazinform agenttiginiń menshikti tilshisi.

Rımdegi týrıster tıyn tastaıtyn ataqty Trevı sýburqaǵy endi aqyly bolady. Budan bylaı tańǵy 09:00-den keshki 22:00-ge deıin (dúısenbi jáne juma kúnderi — 11:30-dan bastap) fontanǵa kirý úshin eki eýro kóleminde bılet satyp alý qajet. Bul shamamen 1200 teńge. Bes jasqa deıingi balalar, múmkindigi shekteýli jandar jáne Rım turǵyndary bul tólemnen bosatylǵan.

Keshki ýaqyt pen tańǵy erte mezgilde sýburqaq mańyna burynǵydaı tegin barýǵa bolady.

Qala bıliginiń esebinshe, bılet satýdan jylyna 6,5 mıllıonnan 20 mıllıon eýroǵa deıin qarjy túsýi múmkin. Bul qarajat nysandy kútip-ustaýǵa jáne qyzmetkerlerdiń jalaqysyna jumsalmaq.

Degenmen ıtalııalyq sheneýnikter bul sheshimniń basty maqsaty tabys tabý emes, týrısterdiń shamadan tys aǵymyn shekteý ekenin atap ótedi. 2025 jyly Trevı fontanyn 10 mıllıonnan astam adam tamashalaǵan. Al eń qarbalas kúnderi munda táýligine 70 myńǵa jýyq týrıst kelgen.

Týrıster fontanǵa tastaıtyn tıyndar burynǵydaı kedeı-kepshikke kómektesetin katolıktik qaıyrymdylyq uıymy — Caritas di Roma-ǵa beriledi. Jyl saıyn fontan túbinen shamamen 1,5 mıllıon eýroǵa teń tıyn jınalady.

Trevı — Rımdegi eń úlken sýburqaq. Ol 1732–1762 jyldary sáýletshi Nıkolo Salvıdiń jobasymen salynǵan. Yrym boıynsha, eger fontanǵa bir tıyn tastasań — Rımge qaıta oralasyń, ekeýin tastasań — mahabbat jolyǵady, úsheýi — nekege turasyń, tórteýi — baılyqqa kenelesiń.

Týrızm salasynyń sarapshylary Rım bul turǵyda Venetsııanyń jolyn qaıtalap otyr deıdi. Buǵan deıin Venetsııa da eń qarbalas kúnderi tarıhı ortalyǵyna kirý úshin aqy engizgen bolatyn.

Osyǵan deıin Rımde jyldamdyq shekteýi saǵatyna 30 shaqyrymǵa deıin tómendetilgeni týraly jazdyq.