Rıdderde áıeli men kúıeýin úıinde óltirip ketti
ÓSKEMEN. KAZINFORM — Shyǵys Qazaqstan oblysy Rıdder qalasynda qaskóı erli-zaıyptyny pyshaqpen óltirip ketken.

ShQO Polıtsııa departamenti baspasóz qyzmetiniń málimetine súıensek, qaladaǵy páterlerdiń birinde eki adamnyń máıiti tabylǵan.
Belgili bolǵandaı, áıeli men kúıeýin óz úılerinde pyshaqtap, óltirip ketken. Kúdiktiniń kim ekeni anyqtaldy. Marqumdardyń artynda kámeletke tolmaǵan eki bala qaldy.
— Qazirgi ýaqytta atalǵan fakti boıynsha qylmystyq is qozǵaldy. Jedel-izdestirý sharalary barysynda qolǵa túsken kúdikti ýaqytsha ustaý ızolıatoryna qamaýǵa alynǵan. Іstiń tergelýi departament basshylyǵynyń jeke baqylaýynda. Ózge aqparatty jarııa etýge zań boıynsha tyıym salynǵan, — delingen habarlamada.
Eske salsaq, buǵan deıin Pavlodarda er adam mas kúıde áıeline pyshaq jaraqatyn salǵany habarlanǵan.