Rıdder JEO-da kómir qory normaǵa jetpeıdi
ASTANA. KAZINFORM – Elimizdiń energııa kózderiniń otyn qoımalarynda 5,2 mln tonna kómir jáne 88 myń tonna mazýt jınaqtalǵan. Bul týraly Úkimet otyrysynda Energetıka mınıstri Almasadam Sátqalıev aıtty.
«Energııa kózderiniń otyn qoımalarynda 5,2 mln tonna kómir jáne 88 myń tonna mazýt jınaqtalǵan. Jalpy normaǵa sáıkes keledi. Tek Rıdder jylý elektr ortalyǵynda kómir qory 20 táýlik normadan 14 táýlikti qana quraıdy. Jınaqtaý jumystary jalǵasýda», - dedi Almasadam Sátqalıev.
Onyń atap ótýinshe, mınıstrlik óńirler boıynsha birqatar aǵymdaǵy máseleni baqylaýda ustap otyr.
«Shyǵys Qazaqstan oblysynyń Rıdder jylý elektr ortalyǵynda 2 qazandyq jumys istep tur. 2 qazandyqty jóndeý aıaqtaldy, iske qosý jumystary júrgizilýde. Taǵy 2 qazandyqty jóndeý 10 qarashaǵa deıin aıaqtalady. Jylytý kezeńinde jumysta 3 qazandyq bolýy tıis. Túrkistan oblysy Kentaý qalasynyń jylý elektr ortalyǵynda №8, 10, 11 qazandyq iske qosyldy. № 5, 6, 9, qazandyqtardyń daıyndyǵy qazan aıynyń ortasyna deıin qamtamasyz etilýi tıis. Qys mezgilinde 4 qazandyq jumys istep turýy qajet. Mańǵystaý oblysynda energııa júıesiniń turaqty túrde jumys isteýi úshin, «Mańǵystaý atom energetıkalyq kombınaty» jaýapkershiligi shekteýli seriktestigi jylý elektr stansasynyń № 3 energııa blogyn jóndeýdi osy jyldyń sońyna deıin aıaqtaý kerek», - dedi ol.
Sonymen qatar mınıstr kúzgi-qysqy kezeńniń turaqty ótýi úshin energetıkalyq kásiporyndar negizgi jáne qosalqy jabdyqtardy jóndeýdi bekitilgen merzimde aıaqtaýyn, otynnyń normatıvtik qorynyń jınaqtalýyn jáne saqtalýyn qamtamasyz etýin erekshe atap ótti. Sondaı-aq energetıkalyq qadaǵalaý jáne baqylaý komıteti energetıkalyq kásiporyndarǵa turaqty tekserýler júrgizip otyrýy qajet.
