Reseıdiń ońtústigin shańdy daýyl basty
ASTANA. KAZINFORM - Reseıdiń Ońtústik federaldy okrýginiń birneshe aımaǵyn shańdy daýyl basty. Kún raıynyń qolaısyzdyǵyna baılanysty federaldy joldarda kóriný qıyndap, elektr jelileriniń úzilýi, sondaı-aq iri landshafttyq órtter tirkelip jatyr, dep habarlaıdy TASS aqparat agenttigi.
Osylaısha, Volgograd oblysynyń birneshe aýdanynda órt sóndirýshiler 1,5-30 ga aýmaqta janǵan shóp pen aǵashty sóndirip jatyr. TJM óńir boıynsha memlekettik mekemesiniń málimetinshe, jalynmen kúresti qatty soqqan jel qıyndatyp otyr.
Rostov oblysynyń memlekettik avtoınspektsııasy da júrgizýshiler men jaıaý júrginshilerge qumdy daýyl saldarynan joldardaǵy qıyndyqtar týraly eskertti. Vedomstvonyń málimetinshe, landshafty órt pen qatty jeldiń saldarynan M-4 «Don» tasjolynyń ýchaskesi tútindep tur.
Sonymen qatar, shańdy daýyl Astrahan oblysynda baıqaldy. Al Qalmaqstanda kýágerler kúshti jel saldarynan elektr jelileri úzilgenin habarlady.
«Fobos» ortalyǵynyń málimetinshe, shańdy daýyl aımaǵy Astrahan, Volgograd, Rostov oblystary, Qalmaqstan, sondaı-aq Daǵystan men Stavropoleni qamtyǵan.
Shańdy daýyl Lýgansk halyq respýblıkasynyń kem degende eki mýnıtsıpalıtetine de soqty. Qaladaǵy joldarda kórý nasharlap, tútin paıda boldy. Lýgansk qalasynda jáne respýblıkanyń birneshe mýnıtsıpalıtetinde qatty jel soǵyp tur.
Kazinfom úshin arnaıy TASS seriktes agenttigi usynǵan.
