Reseıden ımporttalatyn qanttyń quny 25% arzan
ASTANA. QazAqparat – Elimizde shyǵarylatyn qanttyń qunymen salystyrǵanda, Reseıden ákelinetin qant 25%-ǵa arzan. Bul týraly OKQ-de ótken brıfıngide «Aqsý Qant» JShS quryltaıshysy Qaırat Orazbekov aıtty, dep habarlaıdy QazAqparat tilshisi.
«Keıingi 3-4 jylda kórgenimizdeı, bizdiń naryǵymyzda erkindik bolǵanda Reseı men Belarýste shyǵarylǵan qant ákelindi. Olardyń baǵasy otandyq qanttyń qunynan 25%-ǵa arzan. Osy aralyqta Qazaqstandaǵy barlyq qant zaýyttary jumysyn toqtatty. Sebebi, shyǵynǵa batty. Máselen, bizdiń shyǵyn 1,5 mlrd teńge boldy. Bul tek qant máselesine ǵana qatysty emes. 30 jyldyń ishinde kóptegen óńdeý kásiporyndary joǵalyp ketti», - dep toqtaldy Qaırat Orazbekov.
Osyǵan baılanysty zaýyt basshysy shetelden ákelinetin qanttyń baǵasy men otandyq taýardyń qunyn teńestirýdi usyndy. Onyń aıtýynsha, mundaı talap engizilse, onda básekelestik artyp, qazaqstandyq zaýyttar úzdiksiz jumys istemek.
