Reseıde chıkýngýnıa qyzbasy anyqtaldy
MÁSKEÝ. KAZINFORM — Reseıde chıkýngýnıa qyzbasynyń syrttan ákelingen bir jaǵdaıy tirkeldi. Rospotrebnadzordyń habarlaýynsha, naýqas Seıshel araldarynda demalyp kelgennen keıin Máskeýge oralǵan, dep habarlaıdy agenttik tilshisi vedomstvo saıtyna silteme jasap.
Qazirgi tańda jaǵdaı baqylaýda. Málimetke sáıkes, naýqas elge oralǵan soń aýrýhanaǵa jatqyzylǵan. Vırýs arnaıy test-júıelerdiń kómegimen anyqtalǵan.
Infektsııanyń Reseı aýmaǵynda taralý qaýpi tómen, sebebi bul qyzba adamnan adamǵa tikeleı juqpaıdy, tek ınfektsııa juqtyrǵan masalardyń shaǵýy arqyly taralady.
Chıkýngýnıanyń endemıkalyq aımaqtaryna Saharanyń ońtústigindegi Afrıka elderi, Ortalyq jáne Ońtústik Amerıka, Ońtústik-Shyǵys Azııa, Batys Tynyq muhıty aımaǵy, Arab túbegi jáne Úndi sýbkontınenti jatady.
Buǵan deıin Gonkongte alǵash ret chıkýngýnıa bezgegi tirkelgenin jazǵan bolatynbyz.