Rahat Turlyhanov áıeline taǵy qol kótergen
ALMATY. KAZINFORM — Burynǵy ánshi Rahat Turlyhanov taǵy da áıeline qol kóterdi.
Áleýmettik jeliler men buqaralyq aqparat quraldarynda onyń jubaıyn urdy degen kúdikpen ustalǵany týraly aqparat tarady.
Almaty polıtsııa departamentiniń málimetinshe, Medeý aýdanynda bolǵan otbasylyq janjalǵa baılanysty túsken shaqyrtý boıynsha polıtsııa qyzmetkerleri oqıǵa ornyna dereý jetken. Keıin janjalǵa qatysqan taraptar mán-jaıdy anyqtaý úshin aýdandyq polıtsııa basqarmasyna jetkizilgen.
Áıel áýelide ózine kúsh qoldanylǵanyn aıtqan. Alaıda muny joqqa shyǵaryp, otbasylyq janjal boıynsha aryz jazǵan.
— Іsti qaraý nátıjesinde er adamǵa qatysty Ákimshilik quqyq buzýshylyq týraly kodekstiń 73-baby 1-bóligi («Otbasylyq-turmystyq qatynastar salasyndaǵy quqyqqa qarsy áreketter») boıynsha ákimshilik hattama toltyryldy, — dep habarlady polıtsııa departamentiniń baspasóz qyzmeti.
Eske salaıyq, Rahat Turlyhanovty 2024 jyly qańtar aıynda Almatynyń mamandandyrylǵan aýdanaralyq ákimshilik quqyq buzýshylyqtar jónindegi soty jubaıyna qol kótergeni úshin 10 táýlikke qamaýǵa alǵan edi.