Pitir sadaqany aıttyń birinshi kúni bergen ýájip – QMDB
ASTANA. KAZINFORM – Jalpy, pitir sadaqany Ramazan aıynyń birinshi kúninen bastap berýge bolady. Ýaqytynda bere almaǵan jaǵdaıda aıt namazynan keıin berse de eshteńe etpeıdi. Alaıda pitirdi aıt namazyna deıin berý – mustahab.
QMDB tóraǵa orynbasary, naıb múftı, sharıǵat jáne pátýa bóliminiń meńgerýshisi Sansyzbaı Shoqanovtyń aıtýynsha, pitir sadaqasyn qajettiligin qospaǵanda, mal-múlki nısab mólsherine jetken árbir musylmannyń berýi – ýájip. Ol – orazanyń qate-kemshilikterin toltyratyn, Qudaıǵa shúkirshilik etý úshin beriletin jáne kedeılerdi qýantatyn sadaqa.
– Turmysy nashar, ıaǵnı artyq mal-múlki nısab mólsherine jetpegen kisi pitir sadaqa berýge mindetti emes, saýap úshin berip jatsa óz erki. Qaıtys bolǵan adamdarǵa, ana qursaǵyndaǵy balaǵa pitir sadaqa berilmeıdi. Pitir sadaqanyń mólsheri bıdaı, un, arpa jáne qurmanyń quny arqyly bekitiledi, - deıdi Sansyzbaı Shoqanov Kazinform agenttiginiń tilshisine bergen jaýabynda.
Osylaısha, 2024 jylǵy pitir sadaqanyń baǵasy naryqtyq ortasha baǵasymen eseptelip, tómendegideı bekitildi:
Bıdaı 2 keli – 341 teńge.
Un 2 keli – 640 teńge.
Arpa 4 keli – 701 teńge.
Meıiz 2 keli – 5745 teńge.
Qurma 4 keli – 8536 teńge.
Qazirgi tańda bıdaıdyń ózi emes, un, talqan sekildi onyń ónimderi keń qoldanylady. Sol sebepti Qazaqstan musylmandary dinı basqarmasy pitir sadaqanyń qunyn unmen esepteýdi negizge alady. Óıtkeni sharıǵatta bıdaımen qatar onyń ónimderimen de pitir sadaqa berýge ruqsat etiledi.
Osyǵan oraı 2024 jylǵy Ramazan aıyndaǵy bir adam úshin beriletin pitir sadaqa mólsheri 2 keli unnyń naryqtyq ortasha baǵasymen eseptelip, 640 teńge bolyp belgilendi.
«Degenmen baı, aýqatty adamdar pitir sadaqany 2 keli meıizben (5745 teńge) nemese 4 keli qurmamen (8536 teńge) bergeni jaqsyraq. Al pidııa mólsheri – bir adamnyń kúndelikti (tańǵy jáne keshki) toıyp ishetin asy. Onyń bıylǵy mólsheri 3400 (úsh myń tórt júz) teńge bolyp bekitildi. Buǵan shamasy kelmegender orazanyń ár kúnine pitir sadaqasynyń qunyn beredi», - dedi naıb múftı.
