Prezıdent jańa Vıtse-prezıdent týraly: Qarın aýqymdy reformalardy iske asyrýǵa belsendi túrde atsalysty
ASTANA. KAZINFORM — Búgin Quryltaı otyrysynda Memleket basshysy Qasym-Jomart Toqaev Vıtse-prezıdent laýazymyna nelikten Erlan Qarındi usynǵanyn túsindirdi.
— Qurmetti quryltaı depýtattary! Jańa saıası maýsymnyń ashylýy barshańyzǵa qutty bolsyn! Aýqymdy reformalardyń arqasynda Quryltaı ınstıtýty óz jumysyna kiristi. Elimizdiń órkendeý jolynda taǵy bir jaýapty kezeń bastaldy. Quryltaı depýtattary memleketimiz úshin strategııalyq mańyzy zor ózgeristerdi oıdaǵydaı júzege asyrýǵa belsene atsalysyp, el damýyna zor úles qosady dep senemin. Sebebi biz memlekettik basqarý júıesin jańǵyrtyp jatyrmyz. Byltyr bastalǵan konstıtýtsııalyq reforma aıasynda aýqymdy jumys atqaryldy. Bıyl naýryz aıynda Jalpyhalyqtyq referendým ótti. Halqymyz jańa Konstıtýtsııany bir aýyzdan qoldap, daýys berdi. Biz birtutas qoǵam bolyp, el tarıhynda tuńǵysh ret Quryltaı saılaýyn ótkizdik. Zań shyǵarýshy organnyń quramyn tolyq jasaqtadyq, — dedi Qasym-Jomart Toqaev.
Osy oraıda Prezıdent Konstıtýtsııanyń 46-babyna sáıkes Memleket basshysy Qazaqstan Respýblıkasynyń Vıtse-prezıdentin jáne Premer-mınıstrin taǵaıyndaıtynyn eske saldy.
— Atalǵan qyzmetterge laıyq dep tanylǵan kandıdatýralardy ózderińizben kelisip alýymyz qajet. Eń aldymen, Vıtse-prezıdent kandıdatýrasy boıynsha aqyldasýymyz kerek. Men osy laýazymdy Konstıtýtsııaǵa engizýdiń mańyzy jóninde buǵan deıin de aıttym. Vıtse-prezıdent memlekettik basqarý júıesinde aıryqsha ról atqarady. Sondaı-aq bılik tarmaqtary arasyndaǵy teńgerimdi qamtamasyz etedi. Vıtse-prezıdent quryltaı depýtattarymen jáne úkimetpen tyǵyz jumys isteıdi. Konstıtýtsııaǵa sáıkes Memleket basshysy aıqyndaǵan mindetterdi iske asyrady. Men bul laýazymǵa Erlan Tynymbaıuly Qarınniń kandıdatýrasyn usynamyn. Erlan Qarın — elge tanymal azamat. Ol memlekettik basqarý júıesinde uzaq jyl jumys istedi, tájirıbesi mol, otanshyl azamat dep aıtýǵa bolady. Aýqymdy reformalardy sapaly iske asyrýǵa belsendi túrde atsalysty. Memlekettiń strategııalyq baǵdaryn, damý josparyn jaqsy túsinedi. Sondyqtan Erlan Tynymbaıuly Qarındi osy laýazymǵa laıyq dep esepteımin. Quryltaıdan bul kandıdatýrany qoldaýdy suraımyn. Vıtse-prezıdent taǵaıyndalǵan soń men onyń ókilettigi týraly jarlyqqa qol qoıamyn, — dedi Memleket basshysy.
Osyǵan deıin Memleket basshysy Quryltaıda Vıtse-prezıdent laýazymyna kandıdatýrany usynǵanyn jazǵanbyz.
