Memleket basshysy: Uly Jeńis – tarıhymyzdyń ajyramas bóligi

ASTANA. KAZINFORM – Uly Jeńis – tarıhymyzdyń ajyramas bóligi jáne kúlli álem úshin úlken sabaq. Bul týraly Memleket basshysy Qasym-Jomart Toqaev elordada ótip jatqan Uly Jeńistiń 80 jyldyǵyna arnalǵan áskerı paradta aıtty.

- Bıyl Uly Jeńiske – 80 jyl! Barshańyzǵa Uly Jeńis kúni qutty bolsyn! Bul meıram – halqymyzdyń jaýyngerlik rýhynyń sımvoly. Biz eldik úshin kúresken batyr babalardy ulyqtaımyz. Otan qorǵaý jolynda opat bolǵan bozdaqtarǵa taǵzym etemiz. Beıbit kúndi qyraǵy kúzetip turǵan sarbazdarǵa qurmet kórsetemiz. Uly Otan soǵysy búkil adamzat úshin óte qıyn synaq boldy. Onyń zardaby kóptegen elge aýyr tıdi, solardyń ishinde Qazaqstan da bar. Qaharly kúnder soǵystyń tek qasiret ákeletinin kórsetti. Beıbitshiliktiń baǵa jetpes baılyq ekenin uǵyndyrdy. Uly Jeńis – tarıhymyzdyń ajyramas bóligi jáne kúlli álem úshin úlken sabaq. Biz osy aqıqatty árdaıym este saqtaýymyz kerek, - dedi Memleket basshysy.

Prezıdent zulmat kezeńdi bastan ótkergen maıdangerler qazir paradty kórýge kelgenine toqtaldy.

- Qurmetti ardagerler, barsha halyqtyń atynan Sizderge shyn júrekten alǵys aıtamyn! Aǵa býynnyń óshpes erligi – urpaqqa ulaǵat. Otanshyldyǵy men janqııarlyǵy – úlgi-ónege. Biz Uly Otan soǵysynyń ardagerlerin eshqashan umytpaımyz! Barshańyzǵa bas ıemiz! - dedi Qasym-Jomart Toqaev.

Astanada áskerı parad bastalǵanyn jazǵan bolatynbyz.