Prezıdent synyn durys qabyldaımyn - energetıka mınıstri

ASTANA. QazAqparat – Energetıka mınıstri Bolat Aqsholaqov Memleket basshysynyń synyna qatysty pikir bildirdi, dep habarlaıdy QazAqparat tilshisi.

«Prezıdent synyn durys qabyldaımyn. Tutastaı alǵanda, energetıka júıesin basqarý – kún tártibindegi másele. Bul baǵyttaǵy jumys jalǵasyp jatyr. Biz energobaqylaý komıtetiniń quzyretin keńeıtýdi usynyp otyrmyz. Depýtattar bul usynysty qoldady. Osylaısha, endigi ýaqytta energobaqylaý komıtetiniń mindetine jylý jelileri salasy da kiredi. Eger zań qabyldansa, jylý berý júıesine tolyqtaı jaýapty bolamyz», - dedi Bolat Aqsholaqov ortalyq kommýnıkatsııalar qyzmeti alańynda ótken baspasóz máslıhatynda.

Mınıstrdiń aıtýynsha, qazir jylý elektr ortalyqtary jergilikti ákimdikterdiń qaraýynda.

Eske salsaq, 12 jeltoqsanda ótken Úkimettiń keńeıtilgen otyrysynda Memleket basshysy jylý elektr ortalyqtaryndaǵy apatqa qatysty ákimder men mınıstrlerdiń jumysyn synaǵan edi.

«Jaýapty qyzmetkerler qysty qalypty rejımde, aman-esen ótkizemiz dep esep bergen. Biraq, is júzinde jaǵdaıdyń qalaı bolyp jatqanyn kórip otyrsyzdar. Pavlodar oblysynyń ákimi óz ótinishimen qyzmetinen bosatyldy. Al quzyrly memlekettik organ – energetıka mınıstrliginiń eshqandaı áreketin kórgen joqpyz, bul mekeme apatqa selqos qarap, beıtaraptyq tanytty. Sondaı-aq, tótenshe jaǵdaı qyzmetteriniń jumysy durys jolǵa qoıylmaǵan. Olar baıaý qımyldap, salǵyrttyq tanytty», - degen edi Qasym-Jomart Toqaev.

Foto: ortcom.kz