Prezıdent sý tasqynyna qarsy sharalarǵa basa nazar aýdarýdy tapsyrdy

ASTANA. KAZINFORM —  Memleket basshysy Tótenshe jaǵdaılar mınıstri Shyńǵys Árinovti qabyldady. Bul týraly Aqordanyń baspasóz qyzmeti habarlady. 

Prezıdent vedomstvonyń atqarǵan qyzmeti, salada júrgizilgen reformalar jáne tótenshe jaǵdaıdyń aldyn alý, saldaryn joıý jónindegi esepti tyńdady.

Qasym-Jomart Toqaevqa jedeldikti qamtamasyz etý úshin biryńǵaı aýmaqtyq organ qurylǵany jáne basqarýdyń artyq tarmaqtary qysqartylǵany týraly baıandaldy. Komandalyq basqarý jańǵyrtyldy, vedomstvo jumysyna tsıfrlyq tehnologııalar engizildi. Atap aıtqanda, drondardyń kómegimen onlaın beınebaqylaý júrgizýdi jáne vedomstvoaralyq servıstermen ıntegratsııany zor jetistik deýge bolady. Atalǵan jańashyldyqtardy qoldaný arqyly oqys oqıǵalardyń sany – 2,8 paıyzǵa, kisi ólimi – 10,2 paıyzǵa, jaraqat alǵandardyń sany 8,1 paıyzǵa azaıdy.

Mınıstr júzege asyrylǵan ınfraqurylymdyq jobalar týraly, sonyń ishinde Astana qalasynda órt sóndirý deposy men Atyraýda qutqarý beketi salynǵanyn aıtty. Byltyr 14 jańa órt sóndirý deposy paıdalanýǵa berilgen.

Shyńǵys Árinov qutqarýshylardyń jańa kıim úlgisi bekitilgenin, materıaldyq-tehnıkalyq bazany jańǵyrtý jumystary jalǵasyp jatqanyn, áýe kemeleri satyp alynǵanyn jetkizdi. Eldi mekenderdegi qaýipsizdikti qamtamasyz etý úshin «Aýyl qutqarýshylary» vedomstvolyq baǵdarlamasy qolǵa alyndy.

Yqtımal tabıǵı apattarǵa daıyndyqty pysyqtaý úshin Almatyda «Alataý» jedel maqsattaǵy ońtústik bazasy quryldy. Azamattardy ýaqytsha ornalastyrýǵa arnalǵan úsh oryn belgilendi. Kaspıı teńiziniń qazaqstandyq sektorynda «Teńiz jasaǵy» bólimshesi iske qosyldy. Bul qurylym oqys oqıǵaǵa tap bolǵan adamdar men kemelerdi qutqarýǵa mamandanǵan. Tótenshe jaǵdaı aımaǵyna gýmanıtarlyq júkti tasymaldaýmen aınalysatyn «Aıbat» arnaýly maqsattaǵy jasaǵy quryldy. Barlyq óńirde áýe qurylymdaryn jasaqtaý jumystary jalǵasyp jatyr.

Memleket basshysyna sý tasqyny jóninde aqparat berildi. Mınıstrdiń aıtýynsha, respýblıka aýmaǵyndaǵy jaǵdaı turaqty. Qaýip tóngen jaǵdaıda turǵyndardy evakýatsııalaý úshin kúshter men tehnıkalar saqadaı saı. Segiz óńirdegi jaǵdaı baqylaýda. Reseı jáne Qyrǵyzstanmen turaqty túrde aqparat almasý jumystary júrgizilip jatyr.

Prezıdent sý tasqynyna qarsy sharalarǵa basa nazar aýdarý, aldyn ala eskertý júıesin jańǵyrtý jáne tótenshe jaǵdaıdyń saldaryn joıý boıynsha buǵan deıin berilgen tapsyrmalardyń oryndalýyn jalǵastyrý jóninde mindet júktedi.

Aıta ketelik Memleket basshysy «Qazatomónerkásip» ulttyq atom kompanııasy» AQ basqarma tóraǵasy Meıirjan ıÝsýpovty qabyldaǵan edi.