Prezıdent Samuryq-Qazynaǵa qatysty birqatar tapsyrma berdi

NUR-SULTAN. QazAqparat - Memleket basshysy «Samuryq-Qazyna» AQ basqarma tóraǵasy Almasadam Sátqalıevti qabyldady, dep habarlaıdy Aqorda.

Prezıdentke «Samuryq-Qazyna» aktsıonerlik qoǵamyn reformalaýdyń ekinshi kezeńiniń júzege asyrylyp jatqany týraly baıandaldy. Bul kezeńde negizinen portfeldik kompanııalardyń tıimdiligin arttyrýǵa, olardyń shyǵyndaryn ońtaılandyra otyryp, naryqtaǵy qunyn ulǵaıtýǵa basa mán berilip otyr. Bıznestiń áleýmettik jaýapkershiligin arttyrý da asa mańyzdy.

Almasadam Sátqalıev Memleket basshysyna Qordyń strategııalyq aktıvterdegi baqylaýshylyq úlesin saqtaı otyryp, aktıvterdi jekeshelendirý baǵdarlamasyn iske asyrýdy jalǵastyratynyn aıtty.

Sonymen qatar Qasym-Jomart Toqaevqa «Samuryq-Qazyna» aktsıonerlik qoǵamynyń gazben jáne sýmen qamtý, kólik jáne energetıka salalaryndaǵy mańyzdy jobalary jóninde málimet berildi. Bul jobalardyń júzege asyrylýy Qazaqstan halqynyń ómir súrý sapasyn jaqsartýǵa, jańa jumys oryndaryn ashýǵa septigin tıgizedi. Qor basymdyq beretin jobalar tizimin keńeıtýdi josparlap otyr.

Kezdesý qorytyndysy boıynsha Prezıdent Qorǵa qarasty kompanııalar toby qyzmetiniń tıimdiligin arttyrýǵa, sonyń ishinde jobalardy iske asyrýdyń naqty merzimderine jáne halyq aldyndaǵy ashyqtyqty qamtamasyz etýge baılanysty birqatar naqty tapsyrma berdi.