Prezıdent: Onomastıka – belgili adamdardyń týysqandarynyń isi emes

ASTANA. QazAqparat – Memleket basshysy Qasym-Jomart Toqaev Ulttyq quryltaıdyń negizgi otyrysynda onomatsıka máselesinde aımaqtardyń ereksheligi men jalpyulttyq basymdyqtar eskerilýi kerek ekenin aıtty, dep habarlaıdy QazAqparat tilshisi.

«Tól tarıhymyzda erekshe orny bar tulǵalardyń biryńǵaı tizimin ázirleý qajet. Bul tizim elimizdiń ishinde jáne shetelde jalpyulttyq biregeıligimizdi aıshyqtaıtyn basty ustynǵa aınalmaq. Onomastıka salasy tarıhı sana-sezimdi jańǵyrtýdyń mańyzdy ıdeologııalyq quraly ekeni belgili. Keıbir adamdardyń qalaýymen jalǵan ómirbaıany ádeıi qoldan jazylǵan Keńes dáýiriniń qaıratkerleri bar. Ondaı jasandy tulǵalardyń esimin túrli nysandarǵa berýdi doǵarý qajet», - dedi Qasym-Jomart Toqaev.

Memleket basshysy onomastıka salasyn tártipke keltirýdi tapsyrdy.

«Bul sharýa keshendi jáne dáıekti túrde bir ortalyqtan atqarylýǵa tıis. Onomastıka bul – ata-babalarymyzǵa baılanysty ıa belgili tulǵalardyń týysqandarynyń isi emes. Bul – memlekettiń sharýasy. Osy saladaǵy barlyq rásimderdi is júzinde retteý mańyzdy. Onda aımaqtardyń ereksheligimen qatar, jalpyulttyq basymdyqtar da eskerilýi kerek», - dedi Prezıdent.