Prezıdent ınternetti talǵamsyz paıdalaný bala tárbıesine keri áser etetinin aıtty
ASTANA. KAZINFORM – Prezıdent Qasym-Jomart Toqaev Ulttyq quryltaıdyń úshinshi otyrysynda sóılegen sózinde aqparattyq tehnologııanyń paıdaly jaǵyn alyp, zııandy jaǵynan saq bolý kerek ekenin eskertti.
«Tek aqparattyq tehnologııanyń paıdaly jaǵyn alyp, zııandy jaǵynan saq bolǵan jón. Ashyǵyn aıtsaq, bala tárbıesine teris yqpal etip jatyr. Bul – ókinishke qaraı, aqıqat. Balalar túgili, ata-analar da áleýmettik jelidegi maǵynasyz kontentke tym áýes. Biz, eń aldymen, jastardy kitap oqýǵa baýlýymyz kerek. Sonda jappaı kitap oqıtyn ultqa aınalamyz. Táýelsizdik kezeńinde elimizde kitaphana isi kenjelep qaldy. Toqsanynshy jyldardaǵy alasapyran ýaqytta myńdaǵan kitaphana jabyldy. Mıllıondaǵan kitap qorynan aıyryldyq. Sońǵy jyldary jaǵdaıdy túzeý úshin áreket jasalyp jatyr. Kitaphana – memlekettiń, ulttyń negizgi jady. Elimiz úshin qundy tarıhı derekter men materıaldardyń deni kitaphanada saqtalady. Sondyqtan kitaphana isin damytýǵa beı-jaı qaraýǵa bolmaıdy. Kitap oqyrmanǵa qoljetimdi bolýy kerek. Ózderińizge málim, men byltyr Túrkistanda ótken quryltaıda elimizde táýlik boıy jumys isteıtin zamanaýı kitaphana salý týraly aıttym. Ondaı kitaphanalar kóptegen elde bar. Meniń tapsyrmammen Almatyda jáne Astanada kóp uzamaı osyndaı tamasha ǵımarattar boı kótermek. Jalpy bul salany jetildirý úshin basqa da aýqymdy sharalardy qolǵa alý qajet», - dedi Qasym-Jomart Toqaev.
Óz kezeginde Prezıdent depýtattardyń Ulttyq kitap kúnin belgileý týraly usynysyn qoldaıtynyn jetkizdi.
«Almatyda keıbir kitaphanalar zaman talabyna saı jańǵyrtyldy. Onda jastardyń shyǵarmashylyqpen aınalysyp, bilimin ushtaýyna tolyq múmkindik bar. Oblys ákimderi osy jaqsy tájirıbeni jalǵastyrýy kerek. Kitapqumarlyq – jaqsy qasıet. Mysaly, kóptegen memleket Ulttyq kitap kúnin atap ótedi. Bórihan Nurmuhamedov, Aıdos Sarym, Danııar Áshimbaev bastaǵan quryltaı músheleri osyndaı bastama kóterdi. Men olardyń Ulttyq kitap kúnin belgileý týraly usynysyn qoldaımyn. Biraq ony mazmundy etip ótkizý qajet. Mysaly, túrli is-sharalar uıymdastyryp, arnaıy jármeńkeler ótkizý qajet. Shyn máninde, ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek», - dedi Memleket basshysy.
