Prezıdent Energetıka mınıstrliginiń burynǵy basshylaryn synǵa aldy
ASTANA. KAZINFORM – Úkimet josparlanǵan qýat kózderiniń tolyq iske qosylýyn qamtamasyz etýge tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.
- Elektr qýaty turaqty ári jetkilikti kólemde óndirilmese, jasandy ıntellektini engizý jáne jappaı tsıfrlandyrýdy júzege asyrý múmkin bolmaıtyny anyq. Bul másele jóninde men Ulttyq quryltaı otyrysynda pikirimdi anyq aıtyp kettim.
Elimiz elektr energııasynyń ishki tapshylyǵyn joıý úshin ony jyl saıyn ımporttaýǵa májbúr. Byltyr 3,7 mıllıard kılovatt-saǵat energııany syrttan aldyq. Qýat kózderi men elektr jelileriniń ábden eskirýi de bul saladaǵy ahýaldy ýshyqtyryp tur. Ótken úsh jylda «Tarıfti ınvestıtsııaǵa aıyrbastaý» baǵdarlamasy aıasynda energetıka salasyna 1 trıllıon teńgeden astam qarjy salyndy. Bul qarajattyń negizgi bóligi, ıaǵnı 900 mıllıard teńgeden astam qarjy jóndeý jumystaryna jumsaldy. Jańa qýat kózderin iske qosýǵa 140 mıllıard teńge ǵana bólingen. Bul uzaq ýaqyt boıy turaqty energojúıeni qamtamasyz etýge jetpeıtini anyq.
Elektr qýaty jetkiliksiz bolsa, elimiz oıdaǵydaı damı almaıdy. Osy mańyzdy máseleni eskermeı jospar qurý – esh qısynǵa kelmeıtin sharýa. Energetıka mınıstrliginiń burynǵy basshylary tek munaımen shuǵyldanǵan sııaqty, elektr qýaty óndirisi ekinshi qatarda, nazardan tys qaldy. Endi bul olqylyqty tez arada túzetýimiz qajet, - dedi Qasym-Jomart Toqaev.
Bul turǵyda Prezıdent qazirgi kezde Qazaqstanda 123 mıllıard kılovatt-saǵat elektr energııasy óndiriletinin aıtty.
- Bul elimiz úshin jetkiliksiz. Úkimet 2029 jyldyń sońyna deıin 13,3 gıgavattyq jańa qýat kózderin iske qosamyz dep josparlap otyr. Onyń 5,9 gıgavaty jańartylatyn qýat kózderinen alynbaq. Sondaı-aq Úkimet kelesi jyly elektr qýatyna degen suranysty tolyq óteýdi kózdep otyr. Tipti, 1,3 mıllıard kılovatt-saǵat qýatty artyq óndire alamyz degen boljam bar. Biraq bul maqsatqa jetý úshin mindettemeniń bári ýaqtyly oryndalyp, jetkilikti qarajat bólinýge tıis.
Sonymen qatar bizde qýat kózderin iske qosý merzimin qaıta-qaıta keıinge qaldyrý ádetke aınaldy. Mysaly, Almatydaǵy 2-shi jáne 3-shi jylý elektr ortalyǵyn jańǵyrtý merzimi birneshe ret shegerildi. Jumys áli kúnge deıin júrgizilip jatyr. Sondyqtan Úkimet josparlanǵan qýat kózderiniń tolyq iske qosylýyn qamtamasyz etýge tıis. Budan bylaı soza berýge bolmaıdy. Meniń oıymsha, másele naǵyz energetıka mamandarynyń bolmaýynda. Energetıka salasyndaǵy máselelermen «alyp bara jatqan ne bar deısiń?» dep, «azdy-kem bilimi bar, biraq ózine degen senimi mol» kez kelgen adam aınalysatyn boldy, - dedi Memleket basshysy.
Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.