Prezıdent bir palataly Parlament qurý týraly bastama kóterdi

ASTANA. KAZINFORM — Bir palataly Parlament qurý úshin 2027 jyly jalpyulttyq referendým ótkizýge bolar edi. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.

— Men Senatqa on jyl basshylyq ettim. Bul jumysty qashanda zor mártebe ári úlken jaýapkershilik dep sanadym. Sondyqtan maǵan osy minberden parlamenttik reforma týraly aıtý ońaı emes. Soǵan qaramastan men dál búgin elimizde kóp uzamaı bir palataly Parlament qurý týraly bastama kótergim keledi. Birden aıtaıyn, bul — óte mańyzdy másele. Ony asyǵys júzege asyrýǵa bolmaıdy. Bul reforma azamattyq sektorda, sarapshylar ortasynda, sondaı-aq, árıne, qazirgi Parlamentte jan-jaqty talqylanýy qajet, — dedi Prezıdent.

Memleket basshysy reformanyń mán-mańyzy aıryqsha ekenin eskere otyryp, ony talqylaýǵa bir jyl ýaqyt kerek dep oılaıtynyn jetkizdi.

— Sodan keıin, ıaǵnı, 2027 jyly jalpyulttyq referendým ótkizýge bolar edi. Sodan soń Konstıtýtsııaǵa tıisti ózgeris engize alamyz. Men memlekettiń taǵdyryn aıqyndaıtyn barlyq másele halyqtyń kelisimimen ǵana sheshiledi dep buǵan deıin birneshe ret aıttym. Eger bir palataly Parlament qurý qajet degen ortaq sheshimge kelsek, ondaı Parlamentti tek qana partııalyq tizim boıynsha saılaǵan jón dep sanaımyn, — dedi Qasym-Jomart Toqaev

Prezıdenttiń atap ótýinshe, bul — álemde keńinen taraǵan parlamenttik rásim.

— Osylaısha, Májilistiń qazirgi quramy barlyq zańdyq rásimder aıaqtalǵansha óz isimen aınalysa beredi. Senat jalpyulttyq referendýmnyń qorytyndysy shyǵyp, jańa Parlament saılaýy ótkenge deıin alańsyz jumys isteıdi. Al saıası partııalardyń básekeli tartysqa daıyndalýyna ýaqyty bolady. Depýtattarymyz naǵyz memleketshil azamat retinde bul máselege zor jaýapkershilikpen ári túsinistikpen qaraıdy dep oılaımyn, — dedi Qasym-Jomart Toqaev.

Memleket basshysynyń atap ótýinshe, saıası reformalardyń bári elimizdiń birtutas ınstıtýtsıonaldy júıesiniń ajyramas bóligine aınalady.

— Árıne, zańdy suraq týyndaýy múmkin: Prezıdent Parlamenttik reforma jasaý qajettigi týraly nege sonshalyqty erte jarııalap jatyr, áıtpese, saıası tehnologııanyń qaǵıdasyna sáıkes mundaı sharalar tosynnan, kútpegen jerden jasalady emes pe? Biraq men osyǵan deıin de aıttym, taǵy da qaıtalap aıtamyn: men elimizdiń jáne halqymyzdyń taǵdyryna qatysty qandaı da bir máselege kelgende tek qana ashyq saıasat júrgizý kerek dep sanaımyn, mundaı aýqymdy reformany qoǵamnan qupııa ustaýǵa bolmaıdy dep esepteımin. Osyndaı taǵdyrly máseleler boıynsha halyqpen ashyq suhbat júrgizý qajet dep senemin. Sonda ǵana bárimiz bir el bolyp, Ádiletti jáne Qýatty Qazaqstandy qurý jolynda taǵy bir mańyzdy qadam jasaımyz, — dedi Prezıdent.

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.