Prezıdent bastamasymen 3 jylda balalardyń quqyqtaryn qorǵaýǵa baǵyttalǵan 11 zań qabyldandy — Erlan Qarın

Jıynda Bala quqyqtary jónindegi ýákil — Quryltaı Tóraǵasynyń orynbasary Dınara Zákıevanyń, Bas Prokýrordyń birinshi orynbasary Jandos Ómirálıevtiń, Oqý-aǵartý mınıstri Juldyz Súleımenovanyń, Eńbek jáne halyqty áleýmettik qorǵaý mınıstri Asqarbek Ertaevtyń, Densaýlyq saqtaý mınıstri Aqmaral Álnazarovanyń baıandamalary tyńdaldy.

Keńeste eń aldymen Prezıdent Qasym-Jomart Toqaevtyń tapsyrmasymen qabyldanǵan 2026-2030 jyldarǵa arnalǵan «Qazaqstan balalary» birtutas tujyrymdamasyn tıimdi iske asyrý máseleleri talqylandy.

Vıtse-Prezıdent balalardyń tolyqqandy damýyna jan-jaqty jaǵdaı jasaý Memleket basshysy ustanyp otyrǵan baǵdardyń negizgi baǵytynyń biri ekenin atap ótti.

— Prezıdent bastamasymen balalardyń quqyqtaryn qorǵaý, qaýipsizdigin qamtamasyz etý, bilim berý sapasyn arttyrý, densaýlyǵyn saqtaý, áleýmettik qoldaý kórsetý, óskeleń urpaqty konstıtýtsııalyq qundylyqtar rýhynda tárbıeleý baǵytynda tutas sharalar kesheni júzege asyrylýda, — dedi Erlan Qarın.

Vıtse-Prezıdent «Ulttyq qor — balalarǵa» prezıdenttik baǵdarlamasy aıasynda úsh jyl ishinde 7 mıllıonnan astam balaǵa 2,5 mıllıard dollardan astam qarajat aýdarylǵanyn eske saldy. Sondaı-aq Prezıdent bastamalaryn iske asyrý nátıjesinde sońǵy 7 jylda elimizde 1 mıllıonnan astam oqýshyǵa arnalǵan 1342 mektep salyndy.

Sońǵy úsh jylda Memleket basshysynyń bastamasymen balalardyń quqyqtary men múddelerin qamtamasyz etýge baǵyttalǵan 11 zań qabyldandy. Onyń negizgileriniń biri — 2024 jyly qabyldanǵan áıelderdiń quqyqtary men balalardyń qaýipsizdigin qamtamasyz etý týraly zań. Osy zańǵa sáıkes, aldyn alý sharalary engizilip, zorlyq-zombylyqtyń barlyq túrine jaza qatańdatyldy, sondaı-aq býllıngke qatysty jaýapkershilik belgilendi.

Qabyldanǵan zańnamalyq sharalar nátıjesinde kámeletke tolmaǵandarǵa qatysty qylmystyq quqyq buzýshylyqtar sany azaıdy. Atap aıtqanda, 2024 jylmen salystyrǵanda asa aýyr qylmystar sany 45 paıyzǵa, al jasóspirimderdi jynystyq qatynasqa túsýge májbúrleý qylmystarynyń sany 10 paıyzǵa tómendedi. Sonymen qatar kámeletke tolmaǵandar tarapynan jasalatyn qylmystardyń da 10 paıyzǵa azaıǵany baıqalyp otyr.

Óńirlerde Bala quqyqtary jónindegi ýákildiń ókildikteri jumys isteıdi, bala quqyqtary jónindegi basqarmalar quryldy, qorǵanshylyq organdarynyń shtat sany ulǵaıyp keledi. Qalalar men aýdandarda 160 Otbasyn qoldaý ortalyǵy ashyldy.

Mektepterge memlekettik «111» baılanys ortalyǵynyń QR-kodtary ornatyla bastaǵan 2024 jyldan beri balalar psıhologtary 186 myńnan astam habarlama men 6 700 qońyraý qabyldaǵan. 9 myń jaǵdaı boıynsha ómirlik qıyn jaǵdaıǵa tap bolǵan balalarǵa kómek kórsetildi, al 73 jaǵdaıda sýıtsıdtiń aldyn alýǵa múmkindik týdy.

Máselelerdiń taǵy bir bóligi ınklıýzıvti saıasat máselelerine arnaldy. Qazirgi ýaqytta Prezıdent tapsyrmasy boıynsha Quryltaı depýtattary múmkindigi shekteýli balalardy keshendi qoldaýdy retteıtin zań jobasyn ázirleýde.

— Zańnamalyq normalardyń deklaratıvtik sıpatta bolmaǵany, balalardy qoldaý júıesin jaqsartýdy, olardyń quqyqtary men zańdy múddelerin qorǵaýdy qamtamasyz etetin naqty tetikterdi kózdeýi, sondaı-aq ýákiletti memlekettik organdar arasyndaǵy ózara is-qımyldy dál aıqyndaýy asa mańyzdy, — dedi Erlan Qarın.

Buǵan qosa Vıtse-Prezıdent múmkindigi shekteýli jandardy kemsitýdiń aldyn alýǵa jáne oǵan jol bermeýge baǵyttalǵan zańnamalyq normalardy ázirleý qajet ekenine nazar aýdardy.

Jıyn sońynda Erlan Qarın balalardyń quqyqtary men múddelerin qamtamasyz etý ishki saıası jumystardyń basym baǵyty retinde erekshe baqylaýda bolatynyn atap ótti. Osyǵan baılanysty Prezıdent bastamalarynyń iske asyrylý barysy respýblıkalyq keńeste keminde eki aıda bir ret júıeli ári turaqty túrde qaralatyn bolady. Sondaı-aq Vıtse-Prezıdent balalardyń quqyǵyn qorǵaý salasynda Memleket basshysy júktegen tapsyrmalardyń oryndalýyna óńirlik deńgeıde aı saıyn monıtorıng júrgizýdi tapsyrdy.

Budan buryn Qazaqstan bala quqyǵy jóninen álemdik reıtıngte úzdik 25 eldiń qataryna engenin jazǵanbyz.