Prezıdent Abaı oblysynyń ákimi Berik Ýálıdi qabyldady
ASTANA. KAZINFORM – Memleket basshysy Abaı oblysynyń ákimi Berik Ýálıdi qabyldady, dep habarlaıdy Aqordanyń baspasóz qyzmeti.
Prezıdentke óńirdiń áleýmettik-ekonomıkalyq jaǵdaıy týraly esep berilip, aldaǵy kezeńge arnalǵan damý jospary tanystyryldy.
Oblys ákimi jergilikti bıýdjettiń shyǵys jáne kiris bóligine jan-jaqty taldaý júrgizilgenin jetkizdi. Sonyń nátıjesinde qarjylandyrýdyń basym baǵyttary anyqtaldy. Al únemdelgen qarajat ózekti máselelerdi sheshýge jumsalady.
Qasym-Jomart Toqaevqa 2028 jylǵa deıin júzege asyrylatyn 24 ınvestıtsııalyq jobanyń tizimi jasaqtalǵany týraly baıandaldy. Jalpy quny 2,2 trıllıon teńge bolatyn bul bastamalar 8 myńnan astam jumys ornyn ashýǵa múmkindik beredi. Onyń ishinde alty joba bıyl iske qosylady.
Berik Ýálı oblystaǵy áleýmettik nysandardyń jáne kommýnaldyq ınfraqurylymnyń jaı-kúıi jóninde málimet berdi. Atap aıtqanda, turǵyndardyń suranysyna saı mektepter men balabaqshalar salý, mádenıet jáne densaýlyq saqtaý nysandaryn jańǵyrtý josparlanyp otyr. Budan bólek, kommýnaldyq sharýashylyq salasyndaǵy qordalanǵan problemalardy, ásirese Semeı qalasynyń osy baǵyttaǵy máselelerin sheshý óte ózekti.
«Jaıly mektep» ulttyq jobasy aıasynda 5 nysannyń jáne oqýshylar saraıynyń qurylysy qolǵa alyndy. Oblys ortalyǵyndaǵy aspaly kópirdi rekonstrýktsııalaýdyń jobalyq-smetalyq qujattamasy ázirlenip, Ertis ózeni arqyly ótetin taǵy bir kópir salynyp jatyr. Osy rette aspaly kópirdiń júktemesin azaıtyp, kólik nópirin retteý maqsatynda Semeı qalasynda aınalma jol salý máselesi pysyqtalýda.
Memleket basshysy aımaqtaǵy áleýmettik-ekonomıkalyq máselelerdiń sheshilýi turǵyndardyń turmys deńgeıin arttyrýǵa yqpal etetinin atap ótti. Sondaı-aq oblys ákimine Úkimetpen birge óńirdi qarqyndy damytý joldaryn qarastyryp, ózekti máselelerdi kezeń-kezeńimen sheshýdi tapsyrdy.
Qasym-Jomart Toqaev óńdeý ónerkásibin órkendetý, jańadan turaqty jumys oryndaryn ashý, oblys ortalyǵyn abattandyrý jáne ınfraqurylymdy damytý baǵytynda sharalar qabyldaý qajet ekenine toqtaldy. Sonymen qatar Abaıdyń 180 jyldyǵyna arnalǵan mereıtoılyq is-sharalardy laıyqty deńgeıde uıymdastyrýdyń mańyzyna nazar aýdardy.
Osyǵan deıin Berik Ýálı Abaı oblysynyń ákimi bolyp taǵaıyndalǵany týraly jazdyq.