Prada kompanııasy Versace sán úıin satyp alady

ASTANA. KAZINFORM – Italııalyq kompanııa Prada óziniń básekelesi Versace-dy satyp alady. Seısenbi, 30 qyrkúıekte Eýrokomıssııa 1,24 mıllıard eýrolyq kelisimdi maquldady, dep habarlaıdy DW aqparat agenttigi. 

6 mıllıard eýro aınalymy bar eki kompanııa frantsııalyq LVMH jáne Kering lıýks alyptarymen osylaısha básekege túspek. Eki brendtiń birigýi eýropalyq naryqtaǵy básekelestikti buzbaıdy dep baǵalanyp otyr.

Prada kompanııasy Versace brendin amerıkalyq Capri Holdings tobynan alady. Atalǵan top kelissóz barysynda sándi taýarlar naryǵyndaǵy daǵdarys pen keıingi aılarda AQSh-tyń ımporttyq baj salyǵyn arttyrýǵa baılanysty aıtarlyqtaı tómendetilgen baǵamen satýǵa kelisim berýge májbúr boldy.

Frantsııalyq LVMH jáne Kering kompanııalarymen básekege túsedi

– Eki kompanııanyń birigýi jyl saıynǵy aınalymy 6 mıllıard eýrodan asatyn ıtalııalyq sándi taýarlar konglomeratyn qurýǵa múmkindik beredi. Osylaısha olar Frantsııa alpaýyttary LVMH jáne Kering-pen básekege túsedi, - dep habarlaıdy AFP. 

Agenttik Frantsııa konglomerattary keıingi jyldary Gucci, Fendi jáne Bottega Veneta sııaqty birqatar ıtalııalyq brendterdi satyp alǵanyn erekshe atap ótti. 

1978 jyly negizi qalanǵan Versace sán úıi birneshe jyl boıy otbasylyq bızneske aınaldy. Onyń negizin qalaýshy Djannı Versachege 1997 jyly qastandyq jasalǵannan keıin onyń ápkesi Donatella Versache basshylyqty óz qolyna aldy. Naýryz aıynyń sońynda ol shyǵarmashylyq dırektor qyzmetinen ketti.

Aıta keteıik, Prada kompanııasyn 1913 jyly eki aǵaıyndy qurǵan.

Buǵan deıin Parıj jáne Mılan sán aptalyǵynda «Álemdi tańǵaldyrǵan ájeler» jobasy usynylatynyn habarlaǵanbyz.