Pfizer vaktsınasymen aqyly ekpe jasaý múmkin emes - DSM
«Búginde vaktsınanyń birinshi komponentin 10 mln-nan astam adam aldy. Spýtnık V vaktsınasy 6,3 mln, QazVac vaktsınasy shamamen 800 myń, «Sınofarm» vaktsınasy 1,8 mln, «Sınovak» vaktsınasy 250 myń, Pfizer vaktsınasy 770 myń adamǵa salyndy. Bul vaktsınalardyń ishinde tórteýi Dúnıejúzilik densaýlyq saqtaý uıymynyń sertıfıkatyna ıe», - dedi vıtse-mınıstr Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, qazirgi ýaqytta halyqtyń revaktsınatsııa kezinde tańdaý jasaý múmkindigi bar.
«Ókinishke oraı Pfizer kompanııasy aqyly vaktsınatsııa jasaýǵa kelisim bermeı otyr. Kompanııa bul túptep kelgende janama qaıta satylymǵa alyp keledi dep sanaıdy. Densaýlyq saqtaý mınıstrligi men kompanııa arasyndaǵy kelisimshartqa sáıkes, janama qaıta satylymǵa ruqsat berilmeıdi. Osyǵan oraı, Pfizer vaktsınasymen aqyly túrde ekpe jasaý múmkin emes degen sheshimge keldik. Degenmen, keshe vedomstvoaralyq komıssııa múmkindigi shekteýli jáne 50 jastan asqan adamdardy revaktsınatsııalaý týraly sheshim qabyldady», - dedi Jandos Búrkitbaev.
