Petropavlda sáýir aıynda úsh bala terezeden qulady
PETROPAVL. KAZINFORM — Petropavlda abaısyzda terezeden qulap ketken balalardyń barlyǵy túrli jaraqatpen aýrýhanaǵa jatqyzyldy.
Soltústik Qazaqstan oblysy tótenshe jaǵdaılar departamenti basqarmasynyń bastyǵy Áset Shaıkınniń aıtýynsha, sońǵy oqıǵa 25 sáýir kúni bolǵan. Petropavldaǵy «Kashtan» saıajaı qoǵamynda 11 jasar qyz úsh qabatty úıdiń ekinshi qabatyndaǵy terezeden qulap túsken. Jaraqattanǵan jasóspirim oblystyq kópbeıindi balalar aýrýhanasyna jatqyzyldy.
— Statıstıkaǵa súıensek, mundaı oqıǵalardyń shamamen 90% 2-5 jasqa deıingi balalar zardap shegedi. Bul jasta balalar qorshaǵan ortaǵa qyzyǵýshylyǵy joǵary, tanyp-bilgisi keledi, al qaýip sezimi áli tolyq qalyptaspaǵan. Eresekterdiń qaraýynsyz qalǵan bala tereze jaqtaýyna shyǵyp, moskıt toryna súıenýi múmkin. Mundaı jaǵdaıda tor salmaqqa shydamaı, bala onymen birge tómenge qulap ketedi, — deıdi Áset Shaıkın.
Osyǵan baılanysty Tótenshe jaǵdaılar departamenti polıtsııa, bilim berý uıymdary jáne eriktilermen birlesip aldyn alý sharalaryn júrgizip jatyr. Mektepter men balabaqshalarda, ata-analar jınalystarynda turmystyq qaýipsizdik erejeleri túsindirilip, kópqabatty úılerdiń aýlalarynda turǵyndarmen kezdesýler uıymdastyrylǵan.
— Balalardyń terezeden qulap ketýiniń aldyn alý úshin balany eshqashan qaraýsyz qaldyrmańyz. Tereze mańyna jıhaz qoımańyz. Úıde bala bolsa, terezeni ashyq qaldyrmaǵan jón. Qazirgi ýaqytta terezelerge arnalǵan bekitkishter, blokıratorlar, qaýipsizdik qulyptary bar. Al ata-ana mindetterin durys oryndamaý jaýapkershilikke ákeledi, — deıdi basqarma bastyǵy.
Mamandardyń aıtýynsha, úsh jaǵdaıda da kámeletke tolmaǵandardyń terezeden qulaýyna baılanysty ata-analaryna qaraýsyz qaldyrǵany úshin QR Ákimshilik kodekstiń 127-baby boıynsha hattama toltyryldy.
Buǵan deıin Petropavlda úsh jasar bala terezeden qulaǵanyn jazǵan edik.
