Petropavlda muz saraıy men trıatlon park salynady

PETROPAVL. KAZINFORM – Petropavldaǵy ótken kóktemde sýǵa ketken Oıqala aýdanynda trıatlon park boı kóteredi. 

Sý shaıǵan baspanalardyń kópshiligi turýǵa jaramsyz dep tanylyp, buzyldy. Endi osy bos turǵan jerde trıatlon parkten bólek jańa skverler paıda bolady. Bul týraly Petropavl ákimi Soltústik Qazaqstan oblysy ákimdiginiń keńeıtilgen otyrysynda aıtty.

Qala basshysynyń aıtýynsha, bıyl basseıni bar Muz saraıynyń qurylysyn da bastaý josparlanǵan. Sporttyq nysan «Jas órken» shaǵyn aýdanynda boı kóteredi. 

Petropavl kóshelerindegi joldardy jónge keltirý jumysy bıyl da jalǵasady. Byltyr 37 kóshege birinshi ret asfalt tóseldi. 

- 45 kóshede jumys atqarylady, sonyń 42-sinde joldar alǵash ret asfalttalady. Onyń ishinde «Birlik» shaǵyn aýdany da bar. Osy maqsatqa oblystyq bıýdjetten 5 mlrd teńge bólindi, - dedi Serik Muhamedıev. 

Petropavl ákiminiń aıtýynsha, oblys ortalyǵynda 596 aýla bar. Onyń 254-iniń jaǵdaıy nashar. Kvartaldar boıynsha aýlalardy abattandyrý bıyl da qolǵa alynbaq. Ótken jyly 8 kvartalda shamamen 30 aýla jónge keltirilgen. Bıyl 1,5 mlrd teńge bólinip, bul somaǵa 50-den astam aýlany abattandyrý josparlanǵan. 

- Petropavldaǵy shyny aıaldamalarǵa qatysty turǵyndar tarapynan kóptegen syn aıtyldy. Byltyr olardyń 20-sy jyly aıaldamalarǵa aýystyryldy. Bıyl jumysty jalǵastyramyz. Ótken jyly tasymaldaýshylar 33 jańa avtobýs satyp aldy. Búgingi tańda qalanyń avtobýs parki 80%-ǵa jańartyldy, - dedi Serik Muhamedıev.

Buǵan deıin Petropavlda balalar lageri sanatorly-kýrorttyq keshenge aınalatynyn jazǵan edik.