Petropavlda qazdardyń jarysy ótedi

PETROPAVL. KAZINFORM — Petropavlda «Auyl fest. Qaz ósirý sharýashylyǵy» atty halyqaralyq etnomádenı festıval ótpek.

Alǵash ret uıymdastyrylyp otyrǵan is-shara 5 sáýirge josparlanǵan. Festıvaldiń baǵdarlamasy aýqymdy, bul kúni Majarstan, Tatarstan, Bashqurtstan jáne basqa da elderden kelgen jáne qazaqstandyq jetekshi qaz ósirýshiler jáne sarapshylar forýmǵa qatysyp, tájirıbelerimen bólisedi. Keıin N.Pogodın atyndaǵy oblystyq drama teatry alańynda asyl tuqymdy qazdardyń kórmesi ótedi. 

Sondaı-aq jergilikti jáne sheteldik aspazdar qaz etinen dámdi taǵam ázirlep jarysady. 
Al qazdardyń jarysy festıvaldiń kórigin qyzdyra túspek.

Bul bastama — «Aýyl» partııasynyki.

— Halyqaralyq etnomádenı festıvaldi uıymdastyrýdaǵy maqsat — halyqtyń nazaryn qaz sharýashylyǵyna aýdartý. Soltústik Qazaqstan oblysynda qustyń bul túrin ósirýge jaǵdaı qolaıly. Kólderge baı, shóbi shúıgin. Qazir resmı emes málimet boıynsha, óńir jylyna nebary 1,2 mln ǵana osyndaı qus ósiredi. Bul az. Arnaıy fermalar joq, — deıdi is-sharany uıymdastyrýshylardyń biri Ál Farabı Myńbaı.

Bul kúni qaz balapany da 1,5 myń teńgeden satylmaq.

— Balapan jarty jylda jetiledi. 1,5 myń teńgege alyp, bir danasyn 15 myń teńgege satýǵa bolady. Mysaly bıyl qysta kóterme baǵamen alýshylar onyń kelisin 2,8 myń teńgeden aldy. Bazarda 3,5 myń teńgeden turdy. Jeltoqsan aıynda qus etine suranys kúrt artady. Etinen ǵana emes, mamyǵynan da paıda kórýge bolady. Petropavldaǵy fırma onyń kelisin 10 myń teńgeden alady, al reseılikter kelip 12 myń teńgeden áketedi eken, — deıdi Ál Farabı Myńbaı.

Uıymdastyrýshylardyń aıtýynsha, qazdar jarysy alǵash ret ótkiziletin bolǵandyqtan, ony qaljyń dep qabyldap, senimsizdik tanytyp jatqandar kóp eken. Ázirge 16 qaz ıesinen ǵana ótinish túsken. 

— Qazymen kelip qatysqandarǵa 10 myń teńge beremiz. Al eger jeńiske jetip jatsa, birinshi oryn úshin 75 myń teńge, ekinshi orynǵa 50 myń teńge, úshinshi orynǵa 25 myń teńge syıaqymyz bar. Jarystyń óz tártibi bar, qazdy márege tez jetýi úshin urýǵa bolmaıdy, — deıdi Ál Farabı Myńbaı.

Buǵan deıin SQO stýdentteri «Serpindi» nasıhattaýǵa ońtústik oblystarǵa attanǵanyn jazdyq.