Petropavlda «Qaltańyzdaǵy HQO» aktsııasy ótti
«Azamattarǵa arnalǵan úkimet» KE AQ SQO fılıaly baspasóz qyzmetiniń málimetinshe, shara barysynda petropavldyqtarǵa elektrondy tsıfrly qoltańbany qalaı rásimdeýge bolatyny, mobıldik úkimette tirkelý, sondaı-aq aıyppul men salyqtardy onlaın túrde qalaı tóleý kerektigi kórsetildi. Sondaı-aq mamandar turǵyndarǵa «elektrondyq úkimet» veb-portalyn qoldaný daǵdylaryn úıretip, mobıldi azamattar bazasyna tirkedi.
Mamandardyń aıtýynsha, búginde Telegram qosymshasyndaǵy @EgovKzBot arqyly 25 qyzmet qoljetimdi. @EgovKzBot servısi arqyly ár azamat óz betinshe memlekettik qyzmetterdi eshqaıda barmaı, smartfon arqyly ala alady. Onyń ishinde mekenjaı anyqtamasy, zeınetaqy aýdarymdary týraly anyqtama, psıho jáne narkodıspanserdiń anyqtamalary bar, sondaı-aq dárigerdi de osy arqyly úıge shaqyryp, qabyldaýyna jazylýǵa bolady.
MGov.kz mobıldi qosymshasy arqyly bilim, otbasy, jylyjymaıtyn múlik, densaýlyq saqtaý salalary boıynsha jáne t.b. 77 memlekettik qyzmet túri kórsetiledi.
«Jıi suralatyn anyqtamalardyń ishinde mekenjaı, sottylyqtyń bolmaýy, psıhıatrııalyq, narkologııalyq dıspanserlerdiń anyqtamalary bar. Buǵan qosa kez kelgen azamat óz úıine neshe adamnyń tirkelgenin de qaraı alady. Halyqqa qyzmet kórsetý ortalyǵyna kelmes buryn talondy brondaý arqyly, aldyn ala kezekke jazylý múmkindigi de bar», - deıdi «Azamattarǵa arnalǵan úkimet» memlekettik korporatsııasy SQOF mamandary.
Fılıaldyń baspasóz qyzmetiniń málimetinshe, azamattardyń bul qosymshaǵa degen suranysy artyp keledi, tek sońǵy eki aıda ǵana oblysta 1700-deı adam tirkelgen.
Al «Qaltańyzdaǵy HQO» aktsııasy jaqynda óńirdiń barlyq aýdan ortalyqtarynda ótedi.
