Petropavlda gadjetterge qajet mıkrosulbalar jasamaq
PETROPAVL. QazAqparat - Petropavldaǵy «Kırov» atyndaǵy zaýytqa kópqabatty baspa plata shyǵaratyn qondyrǵy ornatyldy. Jańa tehnıka Qazaqstanda alǵashqylardyń biri bolyp Petropavlda túrli gadjetterge arnalǵan mırosulbalardy jasaýǵa múmkindik bermek, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, óńir basshysy Qumar Aqsaqalov «Kırov» zaýytynyń jańa tsehin aralady. Jańa qondyrǵylar 2,2 mlrd teńgege alyndy. 300-ge jýyq avtomattandyrylǵan mehanızmder shamamen bir aıdan keıin iske qosylyp, smartfon, noýtbýk jáne planshetterge qajet mıkrosulbalardy shyǵara bastaıdy.
«Bul keshendi jospardyń «alǵashqy qarlyǵashtary». Jańa tseh ónim kólemin 2 mlrd teńgege ulǵaıtpaq. ıAǵnı, bir jyldyń ishinde qondyrǵy ózin aqtap shyǵady. Qosymsha 48 jumys orny ashylady», - dedi Qumar Aqsaqalov.
SQO-daǵy mashına jasaý salasynyń qos úzdigi - Petropavl aýyr mashına jasaý jáne Kırov zaýyttarynda jańǵyrtý jumystaryna keshendi jospar aıasynda 6,7 mlrd teńge bólingen.
Petropavl aýyr mashına jasaý zaýytyn da oń ózgerister kútip tur. Úsh jylda kásiporyn 4,5 mlrd teńgeniń qondyrǵylaryn satyp almaq. Qazir tıisti 39 qondyrǵynyń 11-i jetkizildi. Óńir basshysy ZIKSTO zaýytyndaǵy jaǵdaıdy da óz baqylaýynda ustaýda.
«ZIKSTO zaýytynda eńbekaqy qaryzy tolyq jabyldy. Qazir jańa basqarý toby keldi. Keshe bas dırektor tanystyryldy. Tapsyrys bar. Zaýyttyń ónimi suranysqa ıe. Shildeniń alǵashqy toqsanynda zaýyt qaıta iske qosylady», - dedi óńir basshysy.
Esterińizge sala keteıik, buǵan deıin «ZIKSTO» zaýytynyń jumysshylaryna shamamen 100 mln teńge bereshegi bolyp, oblys ákimi óz baqylaýyna alǵannan keıin birer aptada qaryzdyń tolyq ótelgenin aıtqan edik.
