Petropavlda esirtki taratty degen kúdikpen sheteldik ustaldy
PETROPAVL. KAZINFORM – Petropavlda polıtseıler esirtki taratty degen kúdikpen 24 jastaǵy jigitti ustady.
Soltústik Qazaqstan oblysy polıtsııa departamenti baspasóz qyzmetiniń málimetinshe, kúdikti jaqyn sheteldiń azamaty. Tekserý kezinde odan jalpy salmaǵy 21,7 gramm bolatyn untaq tárizdi zat salynǵan túıinshekter tárkilendi. Sondaı-aq kúdikti kórsetken jerlerden salmaǵy 3,2 gramm bolatyn osyǵan uqsas zat bar eki túıinshek tabyldy. Saraptama olardyń «mefedron» jáne «tuz» atalyp ketken α-PvP sıntetıkalyq esirtkileri ekenin kórsetti.
Polıtsııa qyzmetkerleriniń sózine qaraǵanda, jas jigit Astanadaǵy aspazdyq jumysyn tastap, esirtki satýmen aınalysý úshin Petropavlǵa kelgen. Tártip saqshylary ony qalaǵa kelgennen keıin 11 kún ótken soń qolǵa túsirdi.
Qazirgi ýaqytta kúdikti qamaýǵa alynǵan, tergeý júrip jatyr.
Mamandardyń aıtýynsha, esirtki taratýshylardyń basym bóligin qazir 18-25 jas aralyǵyndaǵy jastar. Olar qysqa ýaqyt ishinde baıyp ketýdi maqsat etip, teris jolǵa túsedi. Sońǵy 5 jylda SQO-da polıtsııa qyzmetkerleri 18 oqýshy men stýdentti ustady, onyń 8-i – kámeletke tolmaǵandar.
Buǵan deıin SQO Aralaǵash aýylynyń mańyndaǵy kanalda balyq qyrylyp jatqanyn jazǵan edik.
https://kaz.inform.kz/news/sko-aralagash-auilinin-manindagi-kanalda-balik-kirilip-zhatir-9dd7db/