Petropavlda demalys kúnderi mol sý keledi dep kútilýde
PETROPAVL. QazAqparat - SQO-da sý tasqyny jaǵdaıy turaqty dep baǵalanýda, dep habarlady SQO TJD Biryńǵaı kezekshilik dıspetcherlik qyzmet basqarmasynyń bastyǵy Rústem Jumaǵalıev. Bul týraly «QazAqparat» HAA tilshisi habarlady.
Sergeev sý qoımasynan bosatylǵan sý Esil ózeni arqyly Qyzyljar aýdany Novonıkolskoe aýylyna keledi. Sý rekordtyq deńgeıge kóterilgen Esil aýdany Pokrovka aýylynda qazir sý deńgeıi azdap túskeni baıqalady. Taıaýdaǵy eki táýlikte sý Petropavlǵa jetedi.
«Ózen jaǵasynda sý basqan úıler joq. Nıkolaevka, Jarqaıyń aýyldarynda aldyn ala kóshirilgen adamdar sý basý qaýpi bolmaǵan soń, óz úılerine qaıta oraldy. Petrovka aýylynda sý deńgeıi tómendeýde. Pokrovkada sý astynda baý-baqshalar qaldy. Úılerdi sý basqan joq», - dedi Rústem Jumaǵalıev.
Esilde sý deńgeıi rekordtyq belgige kóterildi. Osy túnde Qyzyljar aýdanynyń Semıpolatnoe aýylynda shetki úılerden adamdar men olardyń maldary evakýatsııalandy. Sý úılerge jetpegenimen, qaýip saqtalýda. Eldi mekennen sý búgin ótedi dep kútilýde.
Sergeev sý qoımasynda sý deńgeıi tómendeı bastady. Kúndiz 10 sm boldy. Qazir 2, 35 metrge teń. Petropavl gıdrotorabynda sý deńgeıi 14 santımetrge kóterildi. Ony tranzıttik rejimde aǵyzýda.
«Sý táýlik boıy baqylaýda. Arna boıynsha 9 beket qoıyldy», - dep habarlady Rústem Jumaǵalıev.
