Petropavlda bir top separatıske qatysty sot úkimi shyqty
Petropavl qalalyq soty jumysshylardyń halyq keńesin quryp, Qazaqstannyń tutastyǵyna shúbá keltirgen separatısterge qatysty úkim shyǵardy. Atyshýly jıynǵa qatysqan 19 adamnyń tek tórteýi ǵana sottalyp, olarǵa 9 jáne 7 jylǵa jaza kesildi, dep habarlaıdy Kazinform.
Esterińizge salaıyq, bıyl 19 naýryz kúni Petropavldyń 19 turǵyny jergilikti kolledjderdiń biriniń ǵımaratyna jınalyp, Qazaqstan Respýblıkasynan táýelsiz jumysshylardyń halyq keńesin qurǵandyǵyn jarııalaǵan. Deklaratsııa qabyldaǵan. Budan basqa áleýmettik jelide belsendilik tanytyp, Qazaqstannyń táýelsizdigin joqqa shyǵarýdy maqsat etken jazbalardy jarııalap kelgen.
Keńes otyrysynyń beınejazbasy áleýmettik jelide tarap, halyqtyń narazylyǵyn týdyrdy. Olardy separatızm úshin jaýapqa tartýdy talap etti. 30 naýryzda oblys prokýratýrasynyń nusqaýy boıynsha Ulttyq qaýipsizdik Komıteti SQO departamentiniń, Polıtsııa departamentiniń, Ekonomıkalyq tergeý departamentiniń, oblystyń Sybaılas jemqorlyqqa qarsy qyzmeti qyzmetkerlerinen vedomstvoaralyq jedel-tergeý toby quryldy, separatızm faktisi boıynsha sotqa deıingi tergeýdi bastady.
Separatızmdi nasıhattady dep kúdiktelgen topqa eki qylmystyq is qozǵalǵan, QR Qylmystyq kodekstiń 180-baby 2-bóligi boıynsha Qazaqstan Respýblıkasynyń birtutastyǵy men tutastyǵyn ydyratýdy nasıhattaý nemese oǵan jarııa túrde buqaralyq aqparat quraldaryn jáne telebaılanys jelilerin shaqyrý, materıaldardy taratý jáne Qylmystyq kodekstiń 179-baby boıynsha memlekettiń qaýipsizdigin ydyratýdy úgitteý boıynsha saraptalǵan. Bul aýyr qylmystar sanatyna kiredi. Al topty uıymdastyrýshy Vıacheslav Zýdermanǵa qosymsha QR QK 287 baby 3-bóligi boıynsha is qozǵaldy.
Búgin Petropavl qalalyq soty separatısterge qatysty úkim shyǵardy. Jıynǵa qatysqan 19 adamnyń tórteýi ǵana sottalyp, qalǵany kýáger retinde jaýap berdi.
Sottyń úkimimen Vıacheslav Zýderman 9 jylǵa bas bostandyǵynan aıyryldy. Qalǵan úsh fıgýrant – Elena Boldyreva, Mádına Qaparova jáne Olga Berejnova 7 jylǵa sottaldy. Olar qylmystyq-atqarý júıesiniń ortasha qaýipsizdik mekemesinde jazasyn jazasyn óteıdi.
