Petropavlda byltyr turǵyndar kólikterine 400-den astam VIP nómir rásimdedi
PETROPAVL. KAZINFORM – Soltústik Qazaqstan oblysynda kólikterdiń VIP nómirlerine suranys kúrt artty. 015 kombınatsııasyna ǵana qańtarda 750 turǵyn tapsyrys bergen.
SQO boıynsha «Halyqqa arnalǵan úkimet» memlekettik korporatsııasy fılıalynyń málimetinshe, byltyr Petropavl qalalyq mamandandyrylǵan halyqqa qyzmet kórsetý ortalyǵynda VIP bolyp esepteletin 432 memlekettik tirkeý nómirlik belgileri berilgen. 2024 jyly kólik júrgizýshileri osyndaı 312 nómirdi alǵan.
Byltyr VIP-ke jatatyn eń tanymal bolǵan nómirlik kombınatsııalar – 010, 020, 030, 040, 050, 060, 070, 077, 080, 090 jáne 707. Olardyń árqaısysynyń baǵasy – 57 AEK nemese 224 mln teńge. Al 001, 002, 003, 004, 005, 006, 007, 008, 009 jáne 777 kombınatsııalaryna suranys tómen bolǵan. Bulardyń quny – 285 AEK nemese 1 mln 120 myń teńge shamasynda.
2026 jylǵy 5 qańtardan bastap engizilgen jańa qaǵıdalarǵa sáıkes, qazaqstandyqtarǵa «ádemi» nómirlik belgiler qoljetimdi bola tústi. Mamandardyń aıtýynsha, olar qalaǵan nómirdi sanatyna qaraı 10 AEK nemese 15 AEK, ıaǵnı shamamen 43 myń nemese 65 myń teńgege satyp alý múmkindigine ıe boldy.
Osyǵan oraı, SQO turǵyndary arasynda 015 nómirine qyzyǵýshylyq kúrt artqan. Qańtar aıynda ǵana bul kombınatsııaǵa óńirdiń 750 turǵyny tapsyrys bergen.
Mamandar memlekettik tirkeý nómirlik belgilerin mamandandyrylǵan HQKO nemese elektrondyq úkimet portaly arqyly satyp alýǵa bolatyndyǵyn eske salady. Sonymen qatar kez kelgen bos nómirdi tańdaýǵa bolady. Petropavlda bul qyzmet 15 kúntizbelik kúnde kórsetiledi. Sondaı-aq jedeldetý rásimi qarastyrylǵan.
Jalpy byltyr SQO-daǵy mamandandyrylǵan halyqqa qyzmet kórsetý ortalyqtary men aýdandardyń mamandandyrylǵan sektorlary arqyly 77 myńnan astam kólik tirkeldi. Bul 2024 jyldan 7 myńǵa artyq.
Buǵan deıin «ádemi» nómirlerge onlaın tapsyrys berýge bolatynyn jazǵan edik.