Petropavlda alyp bala dúnıege keldi
PETROPAVL. QazAqparat – Soltústik Qazaqstan oblysy perınataldyq ortalyqta alyp sábı dúnıege keldi. Salmaǵy bes keliden asatyn náresteni petropavldyq áıel dúnıege ákeldi, dep habarlaıdy QazAqparat tilshisi.
SQO densaýlyq saqtaý basqarmasy baspasóz qyzmetiniń málimetinshe, 7 qazan kúni oblystyq perınataldy ortalyqta «alyp» sábı týǵan. Er balanyń salmaǵy - 5 100 gramm. Ol Petropavl turǵynyń ekinshi balasy, áıel sábıdi kesar tiliginsiz ózi týǵan. Bul bıyldyqqa óńirde ómirge kelgen alǵashqy alyp bala.
«Bizdiń dárigerlerdiń biliktiligi men kásibıligi arqasynda anany aman-esen bosandyryp aldyq. Qazirgi ýaqytta náresteniń de, áıeldiń de jaǵdaıy jaqsy, úıine jiberildi. Mundaı shymyr balalar óte sırek dúnıege keledi, ortalyqta jylyna bir-ekeýi ǵana týady. Jalpy 4 myń grammnan assa - iri, al 5 myń grammnan assa - alyp bala dep esepteledi», - deıdi SQO kópsalaly aýrýhanasy perınataldyq ortalyqtyń dırektory Elena Kalıýjnaıa.
Ótken aptada oblystyq perınataldy ortalyqta 89 sábı dúnıege kelse, sonyń 49-y – er bala.
Jalpy bıylǵy toǵyz aıda 3415 náreste dúnıe esigin ashty, onyń 54-i – egizder.
EKO arqyly 108 bala týǵan. Sondaı-aq 10 sábıdiń salmaǵy týǵanda 4 keliden joǵary bolǵan.
Eske sala keteıik, bir jeti buryn Almatyda salmaǵy 5 keliden astam qyz bala dúnıege kelgen edi.
Almatynyń №2 perzenthanasynda 32 jastaǵy áıel júktiliktiń 39 aptasynda patologııa bólimine túsip, salmaǵy 5 328 gramm, boıy 60 sm sábıdi dúnıege ákeldi.
«Mundaı jaǵdaılar óte sırek kezdesedi. Áıel esh qıyndyqsyz bosandy. Qazir anasy men náresteniń jaǵdaıy jaqsy. Úsh kún perzenthanada jatyp, úıine shyǵaryldy», - deıdi bas dárigerdiń orynbasary mindetin atqarýshy Gúlnár Kýrenova.
