Petropavlda 9 qarashadan bastap tótenshe jaǵdaı engiziledi

Petropavlda 9 qarashadan bastap jergilikti aýqymdaǵy tehnogendik sıpattaǵy tótenshe jaǵdaı engiziledi. Oǵan sebep – qaladaǵy káriz kollektorlarynyń biriniń ábden tozyǵy jetip, zaqymdanýy, dep habarlaıdy Kazinform.

Petropavl qalalyq ákimdigi baspasóz qyzmetiniń málimetinshe, 7 qarasha kúni oblys ortalyǵyndaǵy Jýkov - N.Nazarbaev kósheleriniń aýdanynda ornalasqan dıametri 800 mm káriz kollektory zaqymdandy. 1956 jyly salynǵan bul kollektor 19-shy, 20-shy shaǵyn aýdandardan, Jumysshy kentinen, Bereke shaǵyn aýdanynan, Vokzal aýdanynan, Nefteprovodnaıa kóshesiniń aımaǵyndaǵy aǵyndardy jınaıdy.

«Qazirgi ýaqytta kollektor jumys istep tur. Ol ári qara jumys isteýi úshin biz jergilikti aýqymdaǵy tehnogendik sıpattaǵy tótenshe jaǵdaıdy jarııalaý týraly sheshim qabyldadyq. Tótenshe jaǵdaı rejımi 9 qarashadan bastap engiziledi. Biz tez arada 700 metr káriz qubyryn jóndeımiz.

Qubyrlardyń tozýyna baılanysty olardyń zaqymdanýy jıilep ketti. Kollektordyń tolyq isten shyǵýyn boldyrmaý úshin osy ýchaskege shuǵyl jóndeý jumystaryn júrgizý qajet. Osyǵan baılanysty, qala ákimdigi kollektorǵa jedel jóndeý júrgizý úshin osyndaı sheshim qabyldap otyr. Qazir tıisti qujat NQA portalynda jarııalandy», - dedi Petropavl ákimi Serik Muhamedıev.

Qala ákiminiń aıtýynsha, kollektorda tekserý júrgizildi, «Qyzyljar Sý» JShS kúrdeli jóndeýge kirisip ketti. Bul másele oblys pen qala basshylyǵynyń baqylaýynda bolmaq.