Petropavl sý tasqynyna daıyndalýda
PETROPAVL. QazAqparat - Búgin Soltústik Qazaqstan oblysynyń ákimi Qumar Aqsaqalov óńirlik OKQ brıfınginde aımaqtaǵy sý tasqyny jáne jergilikti atqarý organdarynyń oǵan daıyndyqtary jóninde aıtyp berdi, dep habarlaıdy «QazAqparat» HAA tilshisi.
Qazirgi ýaqytta Esil aýdany eń qıyn jaǵdaıda qalyp otyr. Sol aýdanda Esil ózeni arnasynan shyǵyp ketken. Nıkolaevka jáne Petrovka aýyldaryndaǵy úılerdi sý alyp ketti. Bul aımaqta ózen arnasyn jaǵalaı qonystanǵan 11 eldimeken bar.
«3-4 kúnnen keıin qyzyl sý Petropavlǵa keledi. Oǵan tótep berý úshin barlyq sharalar júrgizildi. «Aýyz sýdy ishýge jaramsyz, qalany sý basady» degen daqpyrttar - arandatýshylyq. Bılik jaǵdaıdy baqylaýda ustap otyr. Qyzyl sýdyń kelýine jáne kez kelgen oqıǵaǵa daıyn ekenimizdi taǵy da resmı málimdeımin. Sýdyń qory bar. Sý deńgeıi sorǵy stansasyna deıin kóteriledi dep joramaldap otyrmyz. Buǵan daıynbyz. Kúsh pen quraldar jetkilikti», - dep málim etti Qumar Aqsaqalov.
Oblys ákimi qazir sorǵy stansasyn nyǵaıtý boıynsha jumystar jasalyp jatqanyn habarlady. Sýǵa lastaǵysh zattardyń túsip ketpeýi úshin barlyq sharalar qolǵa alynady.
Sergeevka sý qoımasynda sý deńgeıiniń bógetke joǵary tusyna deıin jetken anyqtaldy. Keshe sý deńgeıi 3,37 metrdi qurady - bul gıdroqurylǵy tarıhyndaǵy rekordtyq kórsetkish. Sý qoımasynyń syıymdylyq kólemi 693 mln tekshe metr bolsa, onda 1,1 mlrd tekshe metr sý jınalǵan. Mundaı kólem eshqashan bolmaǵan.
«Biz keshe aýyl aqsaqaldarymen sóılestik, mundaı alapat sý tasqynynyń qashan bolǵany olardyń esinde joq. Jańbyr, qardyń kúrt erýi saldarynan bir táýlikte 4 ózen arnasynan jaıylyp ketti. 146 úıdi sý basyp, onyń 12-si qalpyna keltirýge jaramsyz bop qaldy. Komıssııa búgin kelgen shyǵyndy baǵamdaý jumystaryn aıaqtaıdy. Aldaǵy bir aıda turǵyndar ótemaqy alady», - dedi Qumar Aqsaqalov.
