Petropavl mańyndaǵy saıajaı ýchaskelerin sý basty
PETROPAVL. KAZINFORM – Petropavldaǵa Zarechnyı kenti men «Rechport» mańyndaǵy saıajaılarǵa sý kirdi.
Soltústik Qazaqstan oblysynyń ákimi Ǵaýez Nurmuhambetov óńirdegi sý tasqynyna qatysty jaǵdaıdy habarlady.
Onyń aıtýynsha, bıyl alǵash ret sý tasqynynyń úshinshi tolqyny ótip jatyr. Petropavlda tasqynnyń sharyqtaý shegi 28–30 sáýirde bolady dep boljanǵan.
- Esil ózenindegi sý deńgeıiniń kóterilýine baılanysty sý jyldaǵydaı alqaptarǵa jaıyldy. Qazir sý Zarechnyı kenti men Rechport mańyndaǵy saıajaı ýchaskelerin basty. Bul saıajaılarda turǵyndar joq, Tótenshe jaǵdaılar departamenti men polıtsııa beketteri qoıyldy.
Oıqala men Bylǵary kentindegi, Qyzyljar aýdanynyń Teplıchnoe jáne Prıbrejnoe aýyldarynda jaǵdaı erekshe baqylaýǵa alyndy.
Sý tasqyny tolyq aıaqtalǵanǵa deıin jaǵdaıdy turaqty baqylaýda ustaımyz. Basty basymdyq — azamattardyń ómiri men múlkin saqtaý. Barlyq qyzmetter joǵary daıyndyqta bolyp, jedel áreket etý kerek, - dedi Ǵaýez Nurmuhambetov.
Esil ózeniniń jaıylma alqabynda ornalasqan Zarechnyı kentinde 6 kópqabatty jáne 90 jeke úı, №13 orta mektep pen túzeý mekemesi bar. Turǵyndardyń qaýipsizdigin qamtamasyz etý jáne múlkin qorǵaý maqsatynda Zarechnyı kentiniń turǵyndaryn qaýipsiz aımaqtarǵa kóshirý týraly sheshim qabyldandy. Osy maqsatta 90 jáne 72 páterli eki kópqabatty úı turǵyzylyp jatyr. Sonymen qatar, jańa túzeý mekemesi men Kopaı shaǵyn aýdanynda 600 oryndyq mektep salynady.
Buǵan deıin Petropavlǵa mol sýdyń kele jatqanyn jazǵan edik.
