«Pepsi Co» Narynqol kartobynan ónim shyǵarady

QONAEV. KAZINFORM — Almaty oblysynda aýyl sharýashylyǵy óniminiń kólemi 751 mlrd teńgege jetti. Oblysta shyqqan ónimder Saýd Arabııasy, Reseı, Qytaı, Ortalyq Azııa elderine satylyp jatyr. Bul týraly oblys ákimi Marat Sultanǵazıev aıtty.

Ákimniń aıtýynsha, byltyr aýyl sharýashylyǵynyń jalpy ónim kólemi 682 mlrd teńgege jetip, óńirlik ónimniń 7%-yn qurady. Bıyl bul kórsetkish 3,3% ósimmen 751 mlrd teńge kóleminde josparlanǵan. Oblystyń aýylsharýashylyq ónimderin eksporttaý kólemi jyldan-jylǵa artyp keledi.

– Máselen, bizdiń oblystaǵy Shın-Laın kompanııasynyń balmuzdaǵy Saýd Arabııasy, Reseı, Qytaı, Ortalyq Azııa elderine shyǵaryldy, «Fruit Art» kompanııasynyń sýblımatsııalyq ónimderi, «LST AGRO» jylyjaıyndaǵy tomat ónimderiniń 90%-y Reseıdiń «Pıaterochka», «Magnıt» sekildi iri saýda jelilerine tikeleı jetkiziledi. Osyndaı kompanııalardyń qarqyndy jumysy nátıjesinde aýylsharýashylyǵy ónimderiniń eksporty ótken jyldyń sáıkes kezeńimen salystyrǵanda 15%-ǵa artyp, 345,2 mln dollarǵa jetti, – dedi M.Sultanǵazıev Ortalyq kommýnıkatsııalar qyzmetinde ótken brıfıngide.

Sonymen birge memlekettik qoldaý aıasynda 13 sút-taýar fermalaryn qurýǵa respýblıkalyq bıýdjetten 15 mlrd teńge bólindi.

– Aýyl sharýashylyǵy ónimin qaıta óńdeýdi ulǵaıtý maqsatynda «Pepsi Co» kompanııasymen kelissózder júrgizdik. Nátıjesinde, Narynqolda ósirilgen kartoptan «Lays» ónimderi shyǵarylatyn boldy, – dedi oblys ákimi.

Onyń aıtýynsha, oblys aýyl sharýashylyǵyna bólinetin sýbsıdııa kólemi boıynsha 8 orynda bolǵanymen, ónim kólemi boıynsha turaqty túrde respýblıkada 5-orynda tur.

– Búginde memlekettik qoldaýdyń 1 teńgesine 17 teńgege ónim shyǵarylýda, bul kórsetkish boıynsha respýblıkada aldyńǵy qatardamyz, – dedi Almaty oblysynyń ákimi.

Buǵan deıin ákim Almaty oblysynyń ekonomıkasy 6 trln teńgege deıin óskenin aıtqan edi.

Sondaı-aq, Almaty oblysynda 1,3 trln teńge ınvestıtsııa tartylyp, 15 ındýstrıaldy aımaq qurylady.